Dekewtişê 2 dewanê Geverî ame qedexekerdiş

2024-06-11 14:08:04


	 

	 

	 

	COLEMÊRG - Qezaya Geverî de operasyonê leşkerî amebî destpêkerdiş û dekewtişê 2 dewan û zozanan seba operasyonî ame qedexekerdiş. 

	 

	Herêma Koyê Sipêrêzî ke dewa Tiloranê Jêrî û Tiloranê Jorî yê qezaya Geverî ya Colemêrgî de, operasyonê leşkerî ame destpêkerdiş. Ame zanayîş ke xeylêk leşkerî û qorîcî tewrê operasyonî bîyî. Destpêkerdişê operasyonî reyde serê pirda mabêne zozanê Horê, Berê Sor û Coniyî bi wesayîtê zirxî noqteyê leşkerî ameyê ronayîş. Ame zanayîş ke xeylêk makîneyê karli herêma operasyonî de ameyê sewqkerdiş. Sewbîna ame zanayîş ke dewanê mîyanênî ameyê ablûqakerdiş û dekewtiş û vejîyayîşê dewan ameyê padayîş. 

	 

	Neql bî ke wareyê koyê Sipêrêz û Omerî de têgêrayîşê teyareyê biçek û bêmerdim est o. 

	 

	Eynî wextî de ame zanayîş ke welatijê ke waştêne pesê xo berê zozanan zî ameyî astengkerdiş.