Xebere mamosteya ziwanê kurdkî ra nîna girewtiş 

2024-06-08 13:11:21


	 

	 

	MERKEZÊ XEBERAN - Mamostaya ziwanê kurdkî Sewsen Hesen Zade zêdeyêr 3 hewteyî yo Rojhelatê Kurdistanî de hetê hêzê Îranî ra ameya tepiştiş û heta nika çarenûsê aye nîno zanayîş.

	 

	Mamosteya ziwanê kurdkî Sewsen Mihemed Zade roja 15ê Gulane hetê hêzê Îranî ra cadeyêk bajarê Bokanî yê Rojhelatê Kurdistanî de bi kuwayîş ameye destbendkerdiş. Heta nika zî keye û avûkatan pêvînayîş bi Sewsen Mihemed reyde nêkerdê û ame vatiş ke Sewsen Mihemed zîndanêk Îtalaetî yê Urmîye de ya.

	 

	Torra Heqê Merdiman ê Kurdistanî neql kerd ke wexto ke Sewsen Mihemed ameya destbendkerdiş tenê reyke bi telefon çend çekuyî keyeyê xo reyde qisey kerda û keyeyî ra vata ke zîndanêk merkezê asayîşî yê Urmîye de bi tenê hucre de manena.

	 

	Goreyê eynî xebera ke Tora Heqê Merdiman daya, çend rey keyeyî seba zanayîşê çarenûsê kênaya xo serdayîşê dadgehe û merkezê asayîşî yê Bokanî kerdê la tu cewabêk zelal nêgirewtê û hewldayîşê înan bênetîce mendê.

	 

	Sewsen Mihemed Zade 17 serrî yo mîyanê bajar û dewanê derûdorî de dersa ziwanê kurdkî dana. Xeylêk rey hetê hêzê asayîşî ra vengdayîşê aye ameyo kerdiş û vatê ke derheqê aye de cipersayîş ameyo akerdiş.