Grevê vêşanîye 100 rojî yo dewam keno: Goş bidê waştişan! 

2024-03-05 13:59:22


	 

	 

	Dîlan Babat

	 

	ŞIRNEX - Grevê vêşanîye yê tepişteyan ê vera tecrîdê girankerde yê serê Rayberê PKKyî Abdullah Ocalanî roja 100ine de yo. Dayikê Aştîye venga goşdarîkerdişê waştişê tepişteyan kerd û vatî: "No zilmî rê êdî bes o." 

	 

	9ê Teşrîna Verêne ya 1998î de hemverê Rayberê PKKyî Abdullah Ocalanî de komployê mîyanneteweyî dest pêkerd û 15ê Sibata 1999î de teslîmê Tirkîya ame kerdiş. Rayberê PKKyî a roje ra nata Îmraliyî de binê tecrîdê giran de yeno tepiştiş. 35 aşmî yo tu xeberêke ci ra nîna girewtiş. Vera tecrîdî û seba azadîya Abdullah Ocalanî 10ê Teşrîna Verêne de 74 merkezanê dinya de bi sloganê "Abdullah Ocalanî rê azadî, problemê kurdî rê çareserîya sîyasî" kampanya dîya destpêkerdiş. 27ê Teşrîna Peyêne de zî zîndananê Kurdistan û Tirkîya de grevê vêşanîye bi eynî waştişan dîya destpêkerdiş. Bi sloganê “Seba edaletî ma tecrîdî bişikinê, seba aştîye ma bibê vengê zîndanan” Wan, Amed, Mêrdîn, Êlih, Mêrsîn, Edene, Stenbol û Îzmîr de bi eynî waştişan çalakîya "Nobeda Edaletî" dîya destpêkerdiş. 

	 

	Dayîkê Aştîye yê Botanî derheqê tecrîd û grevê vêşanîye de ajansê ma JINNEWSî rê qisey kerdî. 

	 

	‘Ma azadîya serekê xo wazenê’ 

	 

	Dayîka Aştîye Zere Ateşe dîyar kerd ke bi serran o seba aştîye xover dana û vat: "Seba ke merg peynî bibo, ganî şer vindero. Ganî goş bidîyo waştişê tepişteyan. Serekê ma 25 serrî yo tepişte yo û ganî serbest bêro verdayîş. Nika ma ver bi 8ê Adare û Newroze ra şinê. Ma do waştişê xo yê aştîye raşteyan de bîyarê ziwan. Ma Dayîkê Aştîye yê û waştişê ma yê yewine zî aştî yo. Bi tepiştiş û kiştişan şima nêeşkenê peynîya ma bîyarê. Ganî bi lezkî serekê ma serbest bêro verdayîş, ma wazenê serekê xo bivînê."

	 

	‘Ma do kuçe bi kuçe waştişanê xo bîyarê ziwan' 

	 

	Emîne Yaliciye bale ant serê waştişê tepişteyan û wina ercnayîşê xo kerd: "Heta ke aştî bêra nê welatî do dayîkî mîyanê têkoşînî de bê. Ma azadîya serekê xo wazenê. Ê zîndanan de ma do zî teber de xover bidê. Ma do raşte bi raşte bigîrê û waştişê xo yê aştîye bîyarê ziwan. Ma na bawerîye de yê ke do rojêke aştî bêra nê welatî."

	 

	'Goş bidê vengê tepişteyan’ 

	 

	Zeynep Benire dîyar kerd ke ganî bi lezkî tecrîd bêro peynîkerdiş û wina dewam kerd: “Ganî her kes vera tecrîdî de bivejîyo û bêveng nêbo. Ma bi serran seba aştîye veng kenê. Ganî dinya bi temamî vera tecrîdî de bivejîyo. La heme dewletî bîyî yew bêveng ê. Ganî hema ke rewşa tepişteyan nêkewta tehluke goşdarîya waştişê înana bêro kerdiş. Nobetê Edaletî û grevê vêşanîye est ê la kesêk goş nêdano vengê ma. Ma do êdî aştî biwazê." 

	 

	'Ma seba aştîye qîrenê' 

	 

	Emîne Ayaze zî wina ercnayîş kerd: "Ganî êdî şer peynî bibo. Serekê ma ganî bi keye û avûkatanê xo reyde pêvînayîş pê bîyaro. Tecrîd zilm o. Ma bi serran o seba caardişê aştîye qîrenê."