Dadîyê Aştîye yê Sêrtî: No rayîrraşîyayîşêk pîroz o 

2024-02-12 14:38:19


	 

	Rabîa Onver

	 

	SÊRT - "Rayîr ra şîyayîşê Pîlî yê Azadîye" qeza û bajaran de bi coşêk pîlî yeno pêşwazîkerdiş. Sêrt de  Dadîyê Aştîye bi Rayîr ra şîyayîşê Azadîye reyde rayîr ra şî û vatî: "No rayîrraşîyayîşêk pîroz o û do bi nê rayîr ra şîyayîşî azadî pê bêro." 

	 

	"Rayîr ra şîyayîşê Pîlî yê Azadîye" ke semedê azadîya fîzîkî ya Rayberê PKKyî Abdullah Ocalanî û çareserîya demokratîke ya problemê kurdî 1ê Sibate de ame destpêkerdiş, dewam keno. Rayîr ra şîyayîşo ke 12 rojî yo bi coşêk pîlî dewam keno. Baskê Qersî Sêrt de bi coşêk pîlî vizêr ame pêşwazîkerdiş. Pêşwazîkerdişî de Dadîyê Aştîye vernî de ca girewtî. 

	 

	Dadîyê Aştîye yê rayîr ra şîyayîşî de cayê xo girewtî ajansê ma JINNEWSî rê qisey kerdî û bale antî serê muhîmîya rayîr ra şîyayîşî.

	 

	'Ma do ser bi kewê'

	 

	Dadîya Aştîye Kumrî Kaçar, dîyar kerd ke bi Azadîya Abdullah Ocalanî do şarê kurdî zî azad bibo û wina vat: "Ma wazenê ke wa Ocalan û pêro tepişteyê sîyasî serbest bêrê veradayîş. Eke ma xoverdayîşê xo dewam bikerê, do Kurdistan zî û Ocalan zî azad bibo. Ma nêtersenê, ma do xo ver bidê û ser bi kewê." 

	 

	Kumrî, dîyar kerd ke semedê azadîya Abdullah Ocalanî sey Dadîyê Aştîye çi destê înan ra bêro do bikerê û wina qedêna: "Gama ke Abdullah Ocalan keyeyê xo ra vejîya, a roje ra heta ewro kurdî û kurdistanî bi azadîye ameyî girêdayîş. No rayîr ra şîyayîş do azadîye bîyaro."

	 

	'Wa gamêke bêro eştiş'

	 

	Abdulmecit Aslan, serra 2012ine de dimayê grevê vêşanîye problemê weşîye ciwîya û dima ra dinyaya xo bedelnaye, dadîya ey Maşallah Işik Aslan, rayîr ra şîyayîşî de ca girewte û vat: "Ma nêwazenê zerrîya  tu dadî biveşa. Ma wazenê gamêke bêro eştiş. Wa  tecrîdê serê Rayberê ma wedarnê. Wa waştişê tepişteyan bi ca bîyarê. No rayîr ra şîyayîşê azadîye, rayîrraşîyayîşêk pîroz o. Ma wazenê ke her kes paştdayîşê rayîr ra şîyayîşî bikerê. Wa gamêke bêro eştiş û azadî pê bêro.”