Rayîr ra şîyayîşê Pîl ê Azadîye: 75 serrî û 75 kesî 

2024-02-10 12:24:39


	 

	 

	Rabîa Onver

	 

	AMED - Raywana Azadîye parlamentera DEM Partîye Nejla Demîre bale ant serê "Rayîr ra şîyayîşê Pîl ê Azadîye" û vat: "Semedo ke Abdullah Ocalan 75 serrî yo ma bi 75 kesan dest bi rayîr ra şîyayîşî kerd. Ma her dingî de hêzêk gird şarî ra girewt. Bi hêzê Rayîr ra şîyayîşê Azadîye do tecrîd têk şêro." 

	 

	9ê Teşrîna Verêne ya 1998î de hemverê Rayberê PKKyî Abdullah Ocalanî de komployê mîyanneteweyî dest pêkerd û 15ê Sibata 1999î de teslîmê Tirkîya ame kerdiş. Rayberê PKKyî a roje ra nata Îmraliyî de binê tecrîdê giran de yeno tepiştiş. 35 aşmî yo tu xeberêke ci ra nîna girewtiş. Vera tecrîdî û seba azadîya Abdullah Ocalanî 10ê Teşrîna Verêne de 74 merkezanê dinya de bi sloganê "Abdullah Ocalanî rê azadî, problemê kurdî rê çareserîya sîyasî" kampanya dîya destpêkerdiş. 27ê Teşrîna Peyêne de zî zîndananê Kurdistan û Tirkîya de grevê vêşanîye bi eynî taleban dîya destpêkerdiş. Bi sloganê “Seba edaletî ma tecrîdî bişiknê, seba aştîye ma bibê vengê zîndanan” Wan, Amed, Mêrdîn, Êlih, Mêrsîn, Edene, Stenbol û Îzmîr de bî bi eynî taleban çalakîya "Nobeta Edaletî" dîya destpêkerdiş.

	 

	"Rayîr ra şîyayîşê Pîl ê Azadîye" ke bi eynî waştişî 1ê Sibate de bi di baskanê Wan û Qersî ra destpêkerd zî dewam keno. Rayîr ra şîyayîşê Azadîye ke herêma Serhedî de bajarê Qersî ra destpêkerd vizêr resa qezaya Licê ya Amedî. Bi bahaneyê ke qedexeyê rayîr ra şîyayîşî est o, çalakî ameye astengkerdiş. Vera astengîyan de raywanê azadîye û girseyo ke tewrê rayîr ra şîyayîşî bîbî, heta awanîya Rêxistina Partîya Têduştîye û Demokrasîyî yê Şaran (DEM Partî) ya Licê rayîr ra şî. Rayîr ra şîyayîş de timî sloganê ‘Ma do bi xoverdayîşî ser bikewê’ ame berzkerdiş.” 

	 

	Raywanê Azadîye ra parlamentera DEM Partîye Nejla Demîre roja 10ine de ajansê ma rê qisey kerd. 

	 

	75 serre, 75 kesî  

	 

	

	 

	Nejlaye da zanayîş ke bi di baskan rayîr ra şîyayîş dest pêkerd û vat: “Rayîr ra şîyayîş hetê 75 kesan ra ame dest pêkerdiş, çike Birêz Ocalan 75 serrî yo. Bi paştîdayîş û coşê şarî ma startê rayîr ra şîyayîşê xo da. Her qeza û bajarî de ma yewbînan verik kerd. bi wesîleya "Rayîr ra şîyayîşê Pîl ê Azadîye" ma do tecrîdî têk berê. Ez na bawerîye de ya.”

	 

	'Raywanê Azadîye hêzêk pîl girewtî' 

	 

	Nejla, dîyar kerd ke her dinge de hafizeyê xo newe kerdê û vat: "Bi taybetî 10 serrê peyên de tedayê hukmatî zêdeyêr bî. Hewl dayî ke ciwanî û şar erc û kulturê xo ra dûrî bikerê. La ma rayîr ra şîyayîş de dî ke no bi newekerdişê hafizeyî. Cayê ke ma şinê bernameyê yadkerdişî û serdayîşê taybet kenê. Ma bî meymanê sifreyê şarî. Ma pîya werd werd. No çî semedê Raywanê Azadîye xeylêk bi moral bî û hêze pîlî da." 

	 

	Nejla, dîyar kerd ke 3 serrî yo agahî Abdullah Ocalanî ra nîna girewtiş û wina vat: "Semedê têkberdişê tecrîdê giran ganî Birêz Ocalan azad bibo. Bi hêzê ke ma 'Rayîr ra şîyayîşê Pîlî yê Azadiye' girewt ma do zorê tecrîdî berê.”