Adalet Kaya: Bêrê û bibê parçeyêk Rayîr ra Şîyayîşê Azadîye 

2024-02-03 10:28:38


	 

	 

	ÎDIR - Parlamentera DEM Partîye ya Amedî Adalet Kaya ke tewrê “Rayîr ra Şîyayîşê Gird ê Azadîye” ke seba azadîya fîzîkî ya Rayberê PKKyî Abdullah Ocalan û seba çareserîya meseleya kurd dîya destpêkerdişî bî û wina vat: “Bêrê şima zî bibê yew parçeyê nê rayîr ra şîyayîşî û ma pîya waştişê azadîya Birêz Abdullah Ocalanî bikerê." 

	 

	“Rayîr ra Şîyayîşê Gird ê Azadîye” ke seba azadîya fîzîkî ya Rayberê PKKyî Abdullah Ocalanî û seba çareserîya meseleya kurdî Wan û Qers de dîya destpêkerdiş, roja 3ine de dewam keno. Bi tewrbîyayîşê 75 aktîvîstan do rayîr ra şîyayîş 15 rojan dewam bikero. Şar paştîdayîşêk gird dano na çalakîya rayîr ra şîyayîşî. 

	 

	Parlamentera Partîya Têduştî û Demokrasîyî yê Şaran (DEM Partî) ya Amedî Adalet Kaya ke tewrê “Rayîr ra Şîyayîşê Gird ê Azadîye” ke seba azadîya fîzîkî ya Rayberê PKKyî Abdullah Ocalan û seba çareserîya meseleya kurdî dîya destpêkerdişî bî derheqê babete de ercnayîş kerd. 

	 

	'Reaksîyonê şarî pozîtîf o’ 

	 

	Adalete da zanayîş ke ê bi tewrbîyayîşê xurt ê şarî startê “Rayîr ra Şîyayîşê Gird ê Azadîye” Qers de dayî û wina vat: “Ma dimayê eşkerayîye şîyî zîyaretê esnafan. Seba ke ma cuyêke têduştî awan bikerê ma dest bi rayîr ra şîyayîşêk winasî kerd. Polîs wazeno ameyîşê ma yê têhet ê bi şarî reyde asteng bikero. La do tu astengî nêbo sebeb ke ma û şar nêrê têkişt. Ma û şar ma do her tim pîya bê.” 

	 

	'Tecrîd şaran rê zî yeno ferzkerdiş' 

	 

	Adalete da zanayîş ke amancê rayîr ra şîyayîşî no yo ke polîtîkayê tecrîdî çinî bikerê û wina vat: “Ma bi israr wazenê nê çîyî bivajê, tecrîdê serê Birêz Ocalanî ewro serê şaran de zî yeno ferzkerdiş. Ma wazenê vera nê de vengê xo berz bikerê la cehd kenê ke asteng bikerê. Ma do zî vengê xo berz bikerê û gird bikerê. Ganî ma îradeyê şaran û waştişê azadîye pîya vila bikerê. Rayîrê nê zî azadîya Birêz Abdullah Ocalanî ra derbaz beno.” 

	 

	Keye bi keye gêrenê 

	 

	Adalete ard ziwan ke bajarê ke tedeyê de keye bi keye gêrenê û amancê rayîr ra şîyayîşî şarî rê vanê û wina dewam kerd: “Şaro ke ma înan reyde yenê têkişt zî waştişê ma keno. Ma keyeyan de tay beşê kitabê Birêz Abdullah Ocalanî wanenê. Ma kombîyayîşê şarî virazenê û tewrbîyayîş xurt o. Şarê ma eleqeyêk gird mojneno ma. No heyecanê şarî hêz dano ma."

	 

	'No rayîr ra şîyayîş bi qîmet o' 

	 

	Adalete qiseykerdişê xo yê peyênan de bale ant serê rayîr ra şîyayîşî û wina vat: “No rayîr ra şîyayîş zaf bi qîmet o. Ma parçeyêk şenik ê nê rayîr ra şîyayîşî yê. Ma tîya ra veng kenê û vanê ke her kes eşkeno kiştêk nê rayîr ra şîyayîşî tepişo. Amancê ma no yo ke şerê Rojhelatê Mîyanênî û şerê serê cografyaya ma wa peynî bibo. Ma sey şarî çîyo ke heqê ma yo ma wazenê. Bêrê şima zî bibê parçeyêke nê rayîr ra şîyayîşî û ma pîya waştişê azadîya Birêz Abdullah Ocalan bikerê."