‘Veng bidê Nobeta Edaletî’ 

2024-01-29 10:54:28


	 

	Elfazî Toral

	 

	STENBOL - Hemsereka GOÇÎZDERî Kamîle Kandale da zanayîş ke ganî heme komel veng bido Nobeta Edaletî û seba wedaritişê tecrîdî her ca de vayê azadî û demokrasîyî bêro. Kamîle wina vat: “Ganî veng bidîyo waştişê tepişte, keye û komelî. Yê ke nê welatî rayîr ra benê eke biwazê probleman çareser bikerê ganî gamêke bierzê. Her kesê ke başîya welatî wazenê ganî veng bidê Nobetê Edaletî.” 

	 

	Rayberê PKKyî Abdullah Ocalan ko 25 serrî yo Îmraliyî de binê tecrîdî de yeno tepiştiş ra no 35 aşmî yo xebere nîna girewtiş. Bi amancê azadîya fîzîkî ya Abdullah Ocalanî, zîndanê Kurdistan û Tirkîya de tepişteyê sîyasî 27ê Teşrîna Peyêne 2023yî de dest bi grevê vêşanîye kerdî. Bi eynî waştişan bajarê Kurdistan û Tirkîya de merdimê tepişteyan dest bi Nobetê Edaletî kerdî. Bi serkêşîya Komeleya Hetkarîya bi Keyeyê Tepişteyan ê Marmarayî (MATUHAY-DER) 13ê Kanûna 2023yî de Stenbol de çalakîya Nobeta Edaletî dîya destpêkerdiş û bi paştîdayîşêk gird çalakî dewam kena. 

	 

	Hemsereka Komeleya Taqîpkerdişê Koçkerdişî (GOÇÎZDER) Kamîle Kandale derheqê Nobeta Edaletî de qisey kerd. 

	 

	Karneya demokrasîyê Tirkîya: Qanûn pê nînê 

	 

	Kamîle da zanayîş ke Nobeta Edaletî çarçeweya çalakîyê kampanyaye de hetê merdimê tepişteyan ra dîya destpêkerdiş û wina vat: “Ma sey rêxistina komelê sivîl nobete zîyaret kerd. Ma karneya demokrasîyî yê welatî ra ewnîyenê, ganî ma qanûnan ra biewnê. Ganî ma biewnê wayîrê çend qanûnanê demokratîkanê. Gelo nê qanûnî pê yenê. Her kes êdî problemê tepişteyan zano. Xebera her kesî rewşa zîndanan ra est a. La çareserî çin a. Qanûn pê nînê.”

	 

	‘Semedê wedaritişê tecrîdî ganî vayê azadîye bêro’ 

	 

	Kamîle dîyar kerd ke Tirkîya de problemê cidî est ê û şar bi probleman reyde rî bi rî yo. Kamîle wina dewam kerd: “Ganî problem bêro çareserkerdiş. Tecrîd yeno manaya binpaykerdişê heq û azadîye. Nika Îmraliyî de tecrîdêk giran est o û tesîrê xo serê heme zîndanan û komelî de zî kerdo. Semedo ke no tecrîd bêro wedaritiş ganî vayê demokrasi û azadîye bêro.” 

	 

	Kamîle eşkera kerd ke çîyê ke koçberî Merkezê Taqîpkerdişê Şirawitişî (GGB) de ciwîyenê tecrîd o û na babete zî vat: “Ewro koçberî rayîrê koçberîye de rastê binpaykerdişan yenê. No tecrîd o. Tecrîd tesîrêk gird serê her kesî de kerdo. Ganî ma her çî ra ver tecrîdî ra bixelisîyê. Semedo ke ma xelas bibê ganî ma goş bidê dadî, cinî û ciwanan.”

	 

	‘Ganî waştişê şarê kurdî bêro goşdarîkerdiş’ 

	 

	Kamîle qiseykerdişê xo yê peyênan de nê çî vatî: “Weçînayîşê herêmî îmkanêk gird o. Ganî no îmkan baş bêro şuxulnayîş. Ganî waştişê şarê kurdî verê çiman de bêro girewtiş. Seba çareserîya problemê kurdî ganî game bêro eştiş. Ganî vengê dadîyê Nobeta Edaletî bêro eşnawitiş. Waştişê keyeyan verê çiman de bêro girewtiş. Ma wazenê nê welatî de têduştî û demokrasî bibo. Ganî semedê aştîye game bêro eştiş. Semedê nê zî ganî ma pîya têbigêrê.”