
‘Wa waştişê tepişteyan bêro qebûlkerdiş’  

2024-01-19 11:44:48


	&nbsp;

	&nbsp;

	Zelal Tunç

	&nbsp;

	WAN - Cinîyan derheqê çalakîya grevê vêşanîye ya tepişteyanê sîyasî yê kurdî û Nobeda Edaletî ke seba azadîya fîzîkî ya Rayberê PKKyî Abdullah Ocalanî û çareserîya problemê kurdî dîyabî destpêkerdiş de qisey kerdî û dîyar kerdî ke ganî waştişî bêrê qebûlkerdiş û venga yewîya şarê kurdî kerdî.&nbsp;

	&nbsp;

	Rayberê PKKyî Abdullah Ocalano ke Zîndanê Asayîşê Berzî yê Tîpê Fyî yê Îmraliyî de tepişteyo ra 34 aşmî yo xebere nîna girewtiş. Kampanyaya ke seba azadîya fîzîkî ya Abdullah Ocalanî û çareserîya probleme kurdî dîyabî destpêkerdiş dewam kena. Kurdistan, Tirkîya û xeylê qezayan de çalakî û bername pê yenê. Tepişteyê Sîyasî çarçeweya kampanyaye de 27ê Teşrîna Peyêne ya 2023î ra nata çalakîya grevê vêşanîye de yê û sewbîna bi eynî waştişî keyeyê tepişteyan Amed, Wan, Mêrdîn, Stenbol, Îzmîr, Edene û Mersîn de Nobeda Edaletî de yê.&nbsp;

	&nbsp;

	Yew bajarê ke Nobeda Edaletî tede dîyayo destpêkerdiş Wan bî. Çalakîya Nobeda Edaletî ya ke hetê Komeleya Hetkarîya Keyeyê Tepişteyan (TUHAY-DER) û merdimê tepişteyan ra dîya destpêkerdiş awanîya Partîya Herêmê Demokratîke (DBP) de dewam kena û seba nobede ziyaret zêde yê. Yê ke ameyî zîyaretê nobeda edaletî derheqê tecrîd, greve vêşanîye yê tepişteyan de qisey kerdî.&nbsp;

	&nbsp;

	Hayrîye Ureke dîyar kerd ke zîndanan de tepişteyê nêweş est ê û grevê vêşanîye dewam keno. Hayrîye wina dewam kerd: “Lajê mi vera ke çîyêk nêkerdo zî 36 serrî ceza ci rê ameya birnayîş. Surgunê xeylê zîndanan kerdî. Nameye lajê mi Ahmet Urek o. Ewil Tekîrdag de tepişîya. Ardî zîndanê Tîpê Fyî yê Wanî. Nika zî Erzîncan de yo. No hîrê aşmî yo semedo ke ez nêweş a û dûrî yo nêeşkena şêra pêvînayîş. Ewil ardî Tîpê Fyî û dima ra berdî Bedlîsî. Tutê ma şertê tecrîdî de nêweş kewtî. Birayê mi zî Edîrne de bî û nika Panos de yo. Di birayê mi estbî. Yew pêrodayîş de dinyaya xo bedelnayî. Ê bîn zî tepişte yo. Ganî şarê kurdî vera înan tedayan de bibo yew.”

	&nbsp;

	‘Kurdî bibî yew do tecrîd wirzo’&nbsp;

	&nbsp;

	Halîme Îtahe zî derheqê tecrîdî de ercnayîşê xo ard ziwan û wina reaksîyon nîşanê tecrîdê serê Rayberê PKKyî Abdullah Ocalanî da û vat: “Ganî ma kurdî vera tecridî de bibêmyew. Yewîtî bibo do tecrîd wirzo.”

	&nbsp;

	‘Ganî ma reaksîyonê xo yê vera tecrîdî nişan bidê’&nbsp;

	&nbsp;

	Reyhan Kaplane zî grevê vêşanîye yê tepişteyan silam kerd û wina ard ziwan: “Ma polîtîkayê tecrîdî yê serê birêz Ocalanî qebûl nêkenê. Ez venga heme kesî kena ke ma merdimê tepişteyan yê ke nobeda edaletî de yê tena nêverdê. 3 serrî yo malumat birêz Ocalanî ra nîno girewtiş. Ganî ma vera tecrîdî de têkoşîn bikerê. Ganî ma her ca de vera polîtîkayê tecrîdî de reaksîyon nîşan bidê.”

	&nbsp;

	‘Ma tecrîdî qebûl nêkenê’&nbsp;

	&nbsp;

	Aklîma Abîye zî wina vat: “Ma tecrîdê serê serekatîyê xo qebûl nêkenê. Ma tecrîdî şermezar kenê. Ez paştîdayîş dana çalakîya dadîyan. Ma nêwazenê dadî bibermê. Wa şer peynî bibo. Ma aştîye wazenê.

	&nbsp;

	‘Wa bere zîndanan bêro akerdiş’&nbsp;

	&nbsp;

	Hazal Surene zî wina vat: “Heme dadîyî eynî dejî ancenê. Ma asayiş wazenê. Wa berê zîndanan bêrê akerdiş.”&nbsp;

	&nbsp;

	Nalîn Şahe zî veng kerd ke ê heqanê xo wazenê û wina peynî kerd: “Tutê ma serbest biverdêne. Ma azadîya serekatîyê xo wazenê. Wa waştişê tepişteyan bêrê qebûlkerdiş.”

	&nbsp;

	&nbsp;