Ramitoxê taksîye destdergê avûkata OHDyî kerd 

2024-01-12 15:11:11


	 

	STENBOL - Endama MLSA û OHDyî avûkate Emîne Ozhîsare da zanayîş ke hetê ramitoxê taksîye ke Taksîmî ra seba şîyayîşê edlîye weyşa bî de raştê tacîzî ameya. OHD û MLSA dîyar kerdî ke do taqîpkarê prosesî bibê. 

	 

	Endama Yewîya Huqûqî ya Komeleya Xebatê Huqûq û Medyaye (MLSA) û Komeleya Huqûqnasê Seba Azadîye (OHD) avûkate Emîne Ozhasare dîyar kerd ke seba ke şêra Edlîyeyê Stenbolî yê Çaglayanî saet dormeyê 12.51î de Taksîm de Gumuşsuyuyî de weyşaya taksî û raştê tacîzî ameya. Emîneye serê hesabê xo yê medyaya dîjîtale de derheqê faîlê tacîzî yê ramitoxê taksîye ke pîlaqeyê wesayîtê ci “34 TFL 23” bî de parekerdişêk kerd û wina vat: “Gerrekerdiş zî tede ez do muracaatê heme rayîrê huqûqî bida.” MLSA zî serê hesabê xo yê dîjîtal medyaye de wina vat: “Sey MLSA ma do bibî taqîpkarê nê hêrişê ke vera avûkata ma de ameyo kerdiş.” 

	 

	Do bibê taqîpkarê prosesî 

	 

	Şûbeyê OHDyî yê Stenbolî derheqê babete de eşkerayîyêke nuştekî weşêna, da zanayîş ke Emîneye wexto ke xebatê xo yê meslekî ca ardêne raştê şîdetê camêrd û tacîzê cînsî ameya û nê çîyî qebûl nêkerda. OHD da zanayîş ke do gerreyê faîlî bikerê û seba ke faîl bêro cezakerdiş taqîpkarê prosesî bibê.