‘Wa fek hêrişanê serê kurdan ra biverdê!’ 

2024-01-03 10:17:44


	 

	 

	Rabîa Onver

	 

	COLEMÊRG - Endamê Meclîsê Dadîyê Aştîye ya Geverî reaksîyon mojnayî hêrişê serê Rojawanê Kurdistanî û wina vatî: "Êdî bes o! Wa fek hêrişanê serê kurdan û tutanê kurdan ra biverdê!" 

	 

	Hêrişê dewleta tirkan yê serê Rojawanê Kurdistanî dewam keno. Hêrişê serê nêweşxaneyan, rezerveyê petrolî, raşteyê komelî bi hawayêkê sîstematîk dewam keno. Bi hêrişan heta nika xeylê merdimî dinyaya xo bedelnayî. Îqtîdar şerê Îsraîl-Fîlîstînî vejeno aver û Hamasî paweno. Wexto ke babete bena kurdî hêrişê xo domneno. Endamê Meclîsê Dadîyê Aştîye ya Geverî reaksîyon mojna hêrişê serê Rojawanê Kurdistanî û venga peynîkerdişê hêrişan kerd.

	 

	'Wa fek hêrişê serê kurdan ra biverdê!’ 

	 

	Emine Atake da zanayîş ke her ca de şer qewimîyeno, Tirkîya de destpêke ra nata verê xo daya Rojawanî û wina vat: "Ma qetilkerdişê sivîlan şermezar kenê. Nêweşxaneyan, depoyê gida û mekteban bombarduman kenê. Qey nê şerî anê sereyê kurdan? Bi serran o malê kurdan, cayê ke îdareyê xo pê anê, nêweşxaneyan kenê hedef. No eyb nîyo? Çi Rojawan û kurdê ke uca de ciwîyenê ra wazenê? Qey heyf nîyo? Ma ê zî merdim nîyê? Qey dewletê mîyanneteweyî nê şerî rê vengê xo nêvejnenê? Wa fek hêrişanê serê kurdan ra biverdê.” 

	 

	'Bes o wa no şer bivindero’ 

	 

	Emineye dîyar kerd ke nê welatî de huqûq û edalet çin o û dewleta ke her çîyî rê bêveng manena hêrişan û kiştişê merdiman rê zî bêveng manena û wina vat: “Wa heme dinya wirzo serê payan. Wa na gonîye û şer vindero. Çîyo ke na dewlete kena qetilkerdişê sivîlan, qetilkerdişê cinîyan û tutan o. Dewlete na teda û zilmî tena serê kurdan de kena. Seba Fîlîstînî vana wa şer biqedîyo la seba kurdan şer dana rayîr ra berdiş. Kam ca de şer bibo kurd vengê xo vejenê û vanê wa aştî pê bêra. La wexto ke hêrişê vera kurdan yeno kerdiş her kes bêveng maneno. Wexto ke mesele bena kurdî dinya ker û lal bena. Bes o wa no şer biqedîyo.” 

	 

	'Seba şarê kurdî her kes bêveng o' 

	

	Zahîde Şene ard ziwan ke hêrişê vera Rojawanî şermezar kena û vat ke Dadîyê Aştîye vera heme şeran de vejîyenê. Zahîdeye wina vat: “Seba şerê Fîlîstînî her kes wirzeno payan ser, seba çi, seba ma kurdan her kes bêveng o. Her tim hêrişê Rojawanî kenê. Şarê kurdî ra çi wazenê? Nêwazenê kurdî cuyêke weş derbaz bikerê. Vengê xo seba Fîlîstînî vejenê. Wa seba Rojawanî zî bivejnê. Kesê ke uca de ciwîyenê zî kurd ê. Dejo ke merdimê uca ancenê ma zî ancenê. Êdî bes o!” 

	 

	'Ma nêwazenê kesêk bimiro' 

	 

	Zahîdeye vat ke ganî hêrişê serê Rojawanî bi lezkî peynî bibî û aştî pê bêra û wina peynî kerd: “Ma senî wazenê şerê Rojawanî vindero ma wazenê şerê Fîlîstînî zî vindero. Çike waştişê ma aştî yo. Ma nêwazenê merdimî bimirê. Ez venga her kesî kena ke seba peynîkerdişê nê şerî ma bibê yew. Êdî bes o. Ma nêwazenê kesêk bimiro.”