Denîz Poyraz rojbîyayîşê xo de ameye yadkerdiş

2024-01-02 15:58:33


	 

	 

	ÎZMÎR - Denîz Poyraz ke hêrişê serra 2021 de hemverê awanîya HDPyî ya Îzmîrî de amebî qetilkerdiş, rojbîyayîşê xo de serê gorê xo de ameye yadkerdiş. 

	 

	Kiştoxê bi nameyê Onur Gencer 17ê hezîrana 2021 de bi çekan hêrişê awanîya Rêxistina Partîya Demokratîke ya Şaran (HDP) ya Îzmîrî kerdibî. Hêriş de Denîz Poyraz (38) ameye qetilkerdiş. Bi wesîleya serra 41ine ya rojbîyayîşê Denîz Poyraz, Meclisê Cinîyan ê Partîya Têduştî û Demokrasî ya Şaran (DEM Partî) ya Îzmîrî, aktîvîstê Tevgerê Cinîyê Azadan (TJA) û Dadîyê Aştiyê serê gorê aye ya Kaynaklarê Bucayî de bi keyeyê aye reyde merasîmê yadkerdişî kerdî. 

	 

	'Ruhê aye ciwîyeno'

	 

	Beşdaran ewilî vilikan dayî serê gorê Denîz Poyraz û deqeyêke rêze girewtî. Dima ra zî dadîya Denîze, Fehîme Poyraz qisey kerd û vat ke kênaya aye tenê nîya û kênaya şarê kurdî ya û pêro kesî wayîrê aye vejîyayê. Fehîme, wina dewam kerd: “Denîze bi hovane ameye qetilkerdiş la ruhê aye her ca de ciwîyeno. Heke şehîd nêbîne, ma do rojbîyayîşê aye bi pîya pîroz bikerdêne. Sipasiya her kesê ameyê tîya kena.”

	 

	‘Dejê ma sey roja ewilî yo’ 

	 

	Hemsereka DEM Partîye ya Îzmîrî Zehra Vezan Karabulut zî xemgînîya xo ard ziwan û wina vat: “Denîze hema cinîyêke ciwan a 38 serrî bî. Bi hovane ameye qetilkerdiş. Serê nê hovîtî ra 3 serrî derbaz bî la dejê ma hema sey roja ewilî yo. Heta peynî do têkoşînê ma dewam bikero. Denîzêke şina û hezar Denîzî yenê.”

	 

	Merasîmê yadkerdişî bi sloganê “Jin, jiyan, azadî” û “Şehîd namirin” peynî bî.