Keyeyê tepişteye Sudan Guvene: Rayîrberîyê zîndanî cewab nêdano 2023-12-30 10:28:01     Rozerîn Gultekîn   AMED - Keyeyê tepişteya nêweşe Sudan Guvena ke yeno şikkerdiş ke bi nêweşîya rîşa merdimwere ya û tehlîyeyê aye 3 reyan ameye astengkerdiş, dîyar kerd ke semedo ke nêverdayî Sudane tewrê cenazeya pîyê xo, birazayê xo û waya xo biba nêweşîya aye giran bîya û dîyar kerd ke raporo ke ameyo amadekerdiş de îbareyê "Lazimî bi dîyîşê doktorê pisporî çin o" ca gêno.    Sudan Guvene serra 2009î de qezaya Bismilî ya Amedî de ameye destbendkerdiş û bi bahaneyê falîyetê DBPyî rayîr ra berda ameya tepiştiş. 15 serrî û 3 aşmî ceza ci rê ameya birnayîş. Sudane prosesê înfazî yê 11 serr û 23 roje 4ê Gulana 2023yî de temam kerd. Her çend ke cezaya tepişteya nêweşe Sudan Guvena ke Zîndanê Tîpê Lyî yê Alanyaye yê Antalyaye de yena tepiştiş biqedîyo zî tehlîyeyê aye hetê Heyetê Çimdarî û Îdareyî ra 3 reyan ame taloqkerdiş. Sewbîna şikê nêweşîya rîşa merdimwere ke Sudane de est a zî yeno kerdiş. No 10 rojî ra zêde yo ke Sudane tedawîya dermanî kortîzonî vînena. Rewşa aye zî her ke şina xirab bena. Sudane bi mektuba ke keyeyê xo yê nuşte bale ancena serê prosesê xo yê zehmetin. Waya Sudane, Fatma Guvene û dadîya aye Gulîstan Guvene ajansê ma rê qisey kerdî.    9 serrî yo nêverdenê bi waya xo reyde fotograf bianca    Waya aye Fatma Guvene da zanayîş ke Sudane dima ke ameya tepiştiş zîndanê Agirîye de menda û dima ra 4 serrî Erzirom de tepişte menda û vat: “Uca ra zî surgunê zîndanê Tîpê Tyî yê Elezîzî ameye kerdiş. Gardîyanan şîdet bi Sudane kerdî û derenceyan ra eştî war. Sudane 3 aşme zîndanê Elezîzî de mend û dima ra surgunê zîndanê Tîpê Lyî yê Alanyaye ameye kerdiş. 9 serrî uca de mende. Şertê ucayî zaf giran ê. No 9 serrî yo nêverdenê ez bi Sudane reyde fotografêk bianca. Ma waşt ke ma biancî la vatî ‘şima ameyî tîya tatîl’. Nika 9 kesî koxuşêke de manenê. Înfazê 3 kesê binan zî ame veşênayîş. Ma rayîrberîyê zîndanî gêrenê la cewab nêdîyeno.”   Rewşa aye giran a    Fatmaye wina dewam kerd: “Verê ke bêra tepiştiş nêweşîyêke aye çinî bî. Sudane serra 2019î de kewte grevê vêşanîye. Dima ra gastrît dest pêkerd. Alanyaye de probleme memikan dest pêkerd. 9 aşmî de dimayê mergê ferdê keyeyî nêweşîya aye giran bî û tesîr nêweşîya aye ser de viraşt. Goreyê mektuba ke ma rê şirawit 7-8 aşmî yo şina doktor. Kewena mamografi û netîce ‘şikê rîşa merdimwere’ yo. Tam nêvanê rîşa merdimwere. Vanê şike rîşa merdimwere est o. Memikê çepî de 4 birînî est ê. Ganî merheleya nêweşîya aye bêro vatiş ke seba nê zî bîyopsîyêk diyîne ferz o. Birîne aye giran bîya. Vila bîya. Sudane hewteyê verêne de vat ke dest bi derzînê kortîzonî yê 6 hewteyî kerda. Roje de di reyan derzin dana xo ra. Pêvînayîşê nê hewteyî de vatî doktor dozê dermanan zêde kerdo. No zî yeno na mana ke nêweşî her ke şina giran bena.”    Nêverdayî bêra tewrê cenazeyan biba    Fatmaye wina qiseykerdişê xo peynî kerd: “Mîyanê 9 aşmî de pîyê mi, birazayê mi û waya mi dinyaya xo bedelnayî. Nêverdayî Sudane tewrê cenazeyan biba. Tewr peynî waya mi dinyaya xo bedelnaye. Ma muracatê kerd ke Sudane bêra la nêverdayî. Ma serê e-nabizî ra netîceyê Sudane ra ewnîyenê, rapor de vajîyeno ke lazimî bi dîyîşê doktorê pisporî çin o. Seba ke Sudane hetê doktorêk pispor ra bêra dîyîş ma muracatê ÎHDyî kerd. Tewr peynî ma aşma Tebaxe de Sudane dî. Seba ke keye nêşêrê pêvînayîşan tepişteyan surgunê cayê dûrî kenê. La ê se bikerê zî do ser nêkewê. Ma kişta înan de yê.”    ‘Ceza serê ceza de birnenê’    Dadîya Sudane, Gulîstan Guvene zî qiseykerdişê xo de da zanayîş ke rewşa Sudane baş nîya û wina dewam kerd: “Kênaya mi verê ke bêra tepiştiş tu nêweşîyêke aye çinî bî. Ez wazenê kênaya mi serbest bêra verdayîş. 10 serrî yo ez kênaya xo nêvînena. Ceza serê ceza de birnenê. Ez wazena kênaya mi serbest bêra verdayîş û ma dermankerdişê aye bikerp. Homa heqê ma nê zaliman rê nêverdo.”