
Dadîya Aştîye Besna Gunaye: Wa her kes tewrê Nobeta Edaletî bibo 

2023-12-27 10:14:28


	&nbsp;

	&nbsp;

	Oznûr Deger

	&nbsp;

	MÊRDÎN - Dimayê xeylê bajaran keyeyê tepişteyan ê Mêrdînî zî dîyar kerdî ke do Nobeta Edaletî bidê destpêkerdiş. Dadîya Aştîye Besna Gunaye wina vat: “Wa tecrîdê serê serekatî û tutanê ma bêro wedaritiş. Wa her kes bêro tewrê nobeta edaletî bibo.”

	&nbsp;

	Zîndananê Tirkîya û Kurdistanî de tepişteyê PKK û PJAKî çarçeweya kampanyaya ‘Abdullah Ocalanî rê azadî probleme kurdî rê çareserî’ 27ê Teşrîna Peyêne de grevê vêşanîye yê bêdem û dorveger dayî destpêkerdiş. Dima ra merdimê tepişteyan çarçeweya eynî hemleyî de Amed, Wan, Mersîn, Edene û Stenbol de dest bi Nobeta Edaletî kerdî. Tepiştetî pêvînayîşê telefonî yê bi keyeyê xo reyde vengê xo danê eşnawitiş û keye zî venga hîsgêrîye rayaumûmîye rê kenê. Dimayê 5 bajaran 22yê Kanûne de dadîyan dîyar kerd ke do Mêrdîn de zî Nobeta Edaletî bidê destpêkerdiş.&nbsp;

	&nbsp;

	Dadîya Aştîye û dadîya tepişte Besna Gunaye derheqê grevê vêşanîye û Nobeta Edaletî de ercnayîş kerd.

	&nbsp;

	‘Çîyêk ke ma ci ra bitersê nêmendo’&nbsp;

	&nbsp;

	Besnaye dîyar kerd ke ganî bi lezkî tecrîdê serê Rayberê PKKyî Abdullah Ocalanî bêro wedaritiş û bale ant serê grevê vêşanîye yê tepişteyan. Besnaye wina dewam kerd: “Her kes zano ke grevê vêşanîye bi kam ci waştişan dîyayo destpêkerdiş. Dadîyê 70-80 serrî zanê ke tutê înan qey dest bi çalakîyan kerdî. Bi amancê paştîdayîşî dest bi Nobeta Edaletî kerdî. Ma dadîyê Mêrdînî zî do dest bi Nobeta Edaletî bikerê. Ma dadîyê aştîye zî binê tecrîdî de yê. Ma ne tepiştiş ra û ne zî merg ra tersenê. Çîyêk ke ma ci ra bitersê nêmendo. Ma her çîyî dî, her çî ame sereyê ma. Wa zilmê serê tepişteyan bêro peynîkerdiş. Wa tecrîd bêro wedaritiş.”

	&nbsp;

	‘Wa problem bêrê çareserkerdiş’&nbsp;

	&nbsp;

	Besnaye dewamê qiseykerdişê xo de ard ziwan ke Heyetê Îdarî û Taqîpkerdişî bi taybetî tehlîyeyê tepişteyan ê ke 30 serrî yo tepişteyî, taloq keno û wina vat: “Tepişteyê ke 30 serrî yo zindan de yê înan rê poşmanî yeno ferzkerdiş. Tehlîyeyê înan 3 aşmî, 6 aşmî, 9 aşmî yeno dergkerdiş. Acaba kesê ke 30 serrî yo tepişte yê do poşman bibê? 3 serrî û 4 aşmî yo ke pêvînayîş bi serekatî reyde nîno kerdiş. Tu xeberêke ci ra nîna girewtiş. O tena rayberê kurdan nîyo, yê heme dinya yo. Ma rewşa ci nêzanê. Malumat ci ra nîno girewtiş. Ne keye û ne zî avukatî nêeşkenê şêrê pêvînayîş. Ganî bi lezkî tecrîd bêro wedaritiş. Bi aştî û têduştî no problem eşkeno bêro çareserkerdiş.”

	&nbsp;

	‘Wa her kes tewrê nobete bibo’&nbsp;

	&nbsp;

	Besnaye qiseykerdişê xo yê peyênan de dîyar kerd ke seba ke dest bi Nobeta Edaletî bikerê amadekarîyanê xo kenê û wina peynî ard: “Ganî ma zî seba tutanê xo cehd bikerê. Ganî ma bibê vengê înan. Tutê ma bîlasebeb yenê tepiştiş. Seba kesêk ke kerra erzeno cezaya muebetî yena birnayîş. La eynî ceza nêdîyena kiştoxan, tecawuzkaran. Semedo ke kurd ê cezaya giran dîyena tutanê ma. Semedo ke ma fek dewaya xo ra nêverdenê ceza kenê. No edalet o, na têduştî ya? Heta peynîya cuya xo ma do têkoşîn bikerê. Ez venga heme dadîyan kena, wa tewrê Nobeda Edaletî bibê.”

	&nbsp;

	&nbsp;