
Çalakîkerê Nobeta Edaletî: Rayîrê azadîye Îmraliyî ra derbaz beno 

2023-12-22 09:10:54


	&nbsp;

	&nbsp;

	Rojda Aydin

	&nbsp;

	WAN - Dadîyê ke tewrê çalakîya Nobeta Edaletî ya Wanî bîyî, dîyar kerdî ke waştişê înan ê yewine wedaritişê tecrîdê serê Îmraliyî yo û vatî ke rayîrê azadîye Îmraliyî ra derbaz beno. Dadîyan venga şaranê dinya kerdî ke veng û waştişê tepişteyan bieşnawê.”&nbsp;

	&nbsp;

	Seba azadîya fîzîkî ya Rayberê PKKyî Abdullah Ocalanî ke 25 serrî yo Girawa Îmraliyî de binê tecrîdê girankerde de yo û 33 aşmî yo ci ra tu xeberêke nîna girewtiş, Kurdistan û Tirkîya de hem teber û hem zî zîndanan de çalakî dîyayî destpêkerdiş. 27ê Teşrîna Peyêne de tepişteyan zîndanan de çarçeweya hemleya “Abdullah Ocalanî rê azadî problemê kurdî rê çareserîya sîyasî” de grevê vêşanîye yê bê dem û dorveger dayî destpêkerdiş û roja 25ine de dewam keno. Eynî wext de teber de zî bi serkêşîya Komeleya Hetkarîya Keyeyê Tepişteyan (TUHAY-DER) û merdimê tepişteyan, Wan, Amed, Mêrsîn, Edene û Stenbol de zî seba eynî çarçeweye Nobeta Edaletî dayî destpêkerdiş. Çalakî bi qerardarî bê maben dewam kena.&nbsp;

	&nbsp;

	Dadîyê çalakîkerî yê ke Wan de nobete de yê qisey kerdî û venga heme dinya kerdî ke waştiş û vengê tepişteyan bieşnawê.&nbsp;

	&nbsp;

	8 serran de reyêk tena eşkaya lajê xo bivîna

	&nbsp;

	Dadîya bi nameyê Fehîme Acara ke lajê aye Nacî Acarî ke Zîndanê Girewte yê Oltu yê Erziromî de tepişte yo û 8 serrî yo zîndan de yo, vana ke 8 serran de tena reyêk lajê xo dîya. Fehîme ard ziwan ke lajê aye de nêweşîyê astim, kolesterol, şekir est o û wina vat: “Linga ci seqet a. Zîndan de destê ci mor benê. Sere de 10 serrî ceza ci rê ameybî birnayîş. Dima ra dewlete dosyayê ci xerepna û 30 serrî ceza da ci. Lajê mi birîndar ame tepiştiş. Yew aşme Zîndanê Wanî de mend û dima ra surgunê Zîndanê Oltu ame kerdiş. No 8 serrî yo lajê mi tepişte yo, la mi tena yew rey lajê xo dîyo. Rayîr dûr o û îmkan çin o ke ez şêra ci bivîna.”

	&nbsp;

	‘Rayîrê azadîye Îmraliyî ra derbaz beno’&nbsp;

	&nbsp;

	Fehîmeye reaksîyon mojna tedaya serê zîndanan û vat ke wa êdî no zilmê serê zîndanan peynî bibo û tepişte serbest bêrê verdayîş. Fehîmeye da zanayîş ke waştişê înan cuyêka azad o û wina dewam kerd: “Wa êdî heme kurdî wurzê payan ser. Wa heme kes destê xo bido serê wîjdanê xo û bibo vengê tepişteyan. Ma nê zilmî nêwazenê. Bi taybetî zî ganî bi lezkî no tecrîdê serê Birêz Ocalanî bêro wedaritiş. Wa tecrîd wurzo û o zî bireso azadîya xo ya fîzîkî. Rayîrê azadîye Îmraliyî ra derbaz beno. Eke tecrîdê Îmraliyî wurzo do tecrîdê serê heme zîndanan wurzo. Ma zî azadî wazenê. Ma na bêvengîya teberî qebûl nêkenê û nêwazenê. Ganî na bêvengî bêra peynîkerdiş. Ganî her kes seba şikitişê tecrîdê serê Birêz Ocalanî wurzo serê payan. Wa Birêz Ocalan û heme tepişteyê ma bi lezkî serbest bêrê verdayîş. Nê tecrîdî vera ewro tutê ma zîndanan de dest bi çalakîya grevê vêşanîye kerdî. Ganî her kes bibo vengê tepişteyan ke waştişê înan pê bêrê. No berpirsyarî serê milê her kesî de yo, tena serê milê keyeyan de nîyo. Coka ra ganî her kes keyeyê xo ra bivejîyo û wurzo serê payan. Coka ra wa şarê ma heme bêro tîya tewrê nobete bibo. Ma waştişê tepişteyanê xo gird bikerê. Ma tutanê xo tena nêverdenê. Wa waştişê tepişteyan pê bêrê, tecrîdê Îmraliyî peynî bibo. Eke Serek azad bibo do hem tepişteyê ma û hem zî heme şar azad bibo.”

	&nbsp;

	‘Wa pêro dinya vengê tepişteyan bieşnawo’&nbsp;

	&nbsp;

	Sosin Oktay ke 27 serrî yo birayê aye tepişte yo, vat ke heta Rayberê PKKyî Abdullah Ocalan azad nêbo pêro tepişteyî û şarê kurdî zî azad nêbenê. Sosine wina dewam kerd: “Hemverê nê tecrîdî nika tepişteyan dest bi çalakîya grevê vêşanîye kerdê. Ê tepişteyî pêro tepişteyê ma yê. Pêro zî semedê nê rayîrî bedelan danê. Ganî ma înan rê wayîr vejîyê. Dej û janê pêro dadîyan yew o. Coka wa pêro dadî paştîdayîş bidê na çalakîye. Vengdayîşê ma tenê semedê şarê Tirkîya nîyo, eynî wextî de pêro dinya rê yo. Sey pêro şaran ziwanê ma zî est o û ma zî wayîrê &nbsp;nasnameyêk ê. Wa dinya vengê tepişteyan bieşnawa ke Tirkîya wezîfeyê xo ca bîyara. Ma kurdî hemverê zulmî sere nêtewênenê, ma zêdeyêr vînenê. Wa şarê kurdî û şarê bînî hemverê nê tecrîdî dest bidê destê yewbînan. Ma bê hêvî nîyê, hêvîya ma est a û do qetî no tecrîd peynî bibo.”&nbsp;

	&nbsp;

	‘Waştişê ma yo sereyîn wedaritişê tecrîdî yo’&nbsp;

	&nbsp;

	Arzû Cîntan ke birayê aye Îlhan Talayo yo ke 10 serrî ceza ci rê ameyo birnayîş, 7 serrî yo tepişte yo û di serrî yo Zîndanê Padeye yê Tokatî de yo, da zanayîş ke waştişê înan wedaritişê tecrîdî yo. Arzûye wina vat: “Ganî ewilî tecrîdê serê Abdullah Ocalanî bêro wedaritiş û dima ra yê serê şarê kurdî. Zîndanan de tepişteyê ma dest bi çalakîya grevê vêşanîye kerdê. Ma zî tîya de hem waştişê wedaritişê tecrîdî kenê û hem zî paştdayîşê tepişteyê xo kenê. Ma wazenê pêro dadî û şarê ma bêrê û tewrê ci bibê. Birayê mi nika Zîndanê Tokatî de yo. Rewşa înan nika uca de krîtîk a. Semedê paştdayîşê waştişê tepişteyanê xo bikerê, ganî pêro kesî bêrê tîya. Bi xususî ganî pêro dadî bêrê tewrê na çalakî bibê û paştdayîşê na çalakî bikerê. Waştişê ma yê sereyîn oyo ke tecrîdê Îmraliyî bêro wedaritiş.”

	&nbsp;