
Dadî ‘teber’ de lajê aye zî ‘zerre’ de çalakîya azadîye de yê 

2023-12-11 14:16:08


	&nbsp;

	STENBOL - Tepişteyan çarçeweya kampanyaya ‘Abdullah Ocalanî rê azadî, problemê kurdî rê çareserîya sîyasî’ grevê vêşanîye dayî destpêkerdiş. Yew dadîya Nobeta Edaletî Fînce Akmane dîyar kerd ke lajê aye zî tewrê grevê vêşanîye yê dore bîyo û vat ke do wayîrê çalakîya grevê vêşanîye bêro vejîyayîş. Fînce wina vat: “Grevo ke tepişteyan da destpêkerdiş xeylê muhîm o. Ganî heme şarê ma bibo vengê têkoşînî. Ma wayîrê tutanê xo vejîyenê. Se beno wa bibo ma do têkoşînî rayîr ra berê û gird bikerê. Ma zî teber de çi destê ma ra bêro ma do bikerê. Têkoşînê tepişteyan têkoşînê ma yo.”&nbsp;

	&nbsp;

	Rayberê PKKyî Abdullah Ocalano ke 25 serrî yo Îmraliyî de binê tecrîdê giran de yeno tepiştiş ra tu xeberêke nîna girewtiş. Seba azadîya fîzîkî ya Abdullah Ocalanî her çar hetê dinya de çalakî, rayîr ra şîyayîş û bernameyê cîya cîyayî dewam kenê. Semedê azadîya Abdullah Ocalanî û çareserîya sîyasî ya problemê kurdî 10ê Teşrîna Verêne de 74 merkezê dinya de kampanyaya ‘Abdullah Ocalanî rê azadî problemê kurdî rê çareserî’ dîya destpêkerdiş. Tepişteyê sîyasî zî 27ê teşrîna peyêne de eşkera kerdî ke çarçeweya kampanyaye de dest bi grevê vêşanîye yê dorveger kerdî. Çalakî roja 15ine de dewam kena û her ke şina hûmara tepişteyan yê ke tewrê grevê benê, zêde bena.&nbsp;

	&nbsp;

	Waştişê tepişteyan azadîya fîzîkî yo&nbsp;

	&nbsp;

	Yew tepişteyo ke destpêkerdiş de tewrê grevê vêşanîye bî Yakup Akmanî yo ke Zîndanê Sîlîvrîye de yeno tepiştiş o. Yakup bado ke şewatê 19ê Êlula 2019î yê Daristanê Aydosî yê Pendîkî vejîya, bi îdîayê ‘çarçeweya falîyetê rêxistinî de daristan veşênayo, yewîya welat xerepnayo’ ame muhakemekerdiş û 25 serrî û cezaya muebeto giran ci rê ame birnayîş.&nbsp;

	&nbsp;

	Dadîya Yakupî, Fînce Akmane zî teber de Stenbol de Nobeta Edaletî de ya û derheqê çalakîya ke lajê aye û tepişteyê bînî dayî destpêkerdiş de qisey kerd.&nbsp;

	&nbsp;

	Bedelê kurdbîyayîşî…&nbsp;

	&nbsp;

	Fînce da zanayîş ke 25 serrî û cezaya muebetî lajê aye rê ameya birnayîş û vat: “Cezaya ke lajê mi rê ameya birnayîş bi edaletin nîya. Çike tu sucê lajê mi çin o. Bîlasebeb cezaya muebetî dayî lajê mi. Dozger, dadgerî îfadeyê ma verê çiman de nêgirewtî. Îfadeyê lajê mi zelal bî. Vat ‘Seba ke ez kurd a şima mi tepêşenê.’ Weşîya lajê mi xirab a. Cezaya muebetî dayî. Nê welatî de edalet, huqûq çin o.”

	&nbsp;

	‘Wa dewlete waştişê tepişteyan bîyara ca’&nbsp;

	&nbsp;

	Fînce dîyar kerd ke 27ê Teşrîna Peyêne de tepişteyê sîyasî zîndananê Kurdistan û Tirkîya de kewtî grevê vêşanîye û wina dewam kerd: “Heta çareserîyêk pê nêra do grev dewam bikero. Tepişteyî mesajan de dîyar kenê ke heta çareserîyêk pê nêra û heta ke azadîya fîzîkî ya Abdullah Ocalanî pê nêra do grev dewam bikero. Ganî dewlete na nuqta de çareserîyêk pê bîyara. Ganî waştişê tepişteyan bîyara ca. Ganî peynîya bêhuqûqîyan bêra ardiş. Waştişê tepişteyan dîyar o. Coka ra ganî bi lezkî waştişê înan bêro qebûlkerdiş. Çîyêk bêro sereyê tutanê ma, ma yew bêveng nêmanenê.”&nbsp;

	&nbsp;

	Ma do wayîrê têkoşînê tepişteyan bivejê

	&nbsp;

	Fînce qiseykerdişê xo de ard ziwan ke do wayîrê têkoşînê tepişteyan biveja û vat: “Grevê vêşanîye yê tepişteyan xeylê muhîm û ercaye yo. Ez têkoşînê înan pîroz kena. Têkoşînê înan wayîrê ercî yo. Ma pey dewaya înan de yê. Heq û huqûq wazenê. No heqê înan yê tewr xozayî yo. Ma aştîye wazenê. Ma şer nêwazenê.”

	&nbsp;

	‘Venga têkoşînî’&nbsp;

	&nbsp;

	Fînce wina qiseykerdişê xo peynî kerd: “Ez venga têkoşînê yewbîyaye bi heme şaran rê kena. Ganî ma veng bidê têkoşînê tepişteyan. Ganî ma wayîrê tutanê xo bivejê. Kam ca de beno wa bibo ma do têkoşînî gird bikerê û rayîr ra berê. Tutê ma ercayeyê. Ê zerre de grev de yê. Ganî ma zî teber de çi destê ma ra bêro ma bikerê. Têkoşînê tepişteyan ê ma hemeyan o.”

	&nbsp;

	&nbsp;