
Semedê grevê vêşanîye venga berzkerdişê vengî  

2023-12-05 10:46:49


	&nbsp;

	&nbsp;

	AMED - Îdarekara HEDEPî ya Amedî Serra Bucake derheqê grevê vêşanîye yê tepişteyan ke vera tecrîdî de dayî destpêkerdiş de qisey kerd û vat: “Ma venga heme rayaumûmî kenê ke paştîdayîş bidê xoverdayîşê zîndanan, grevê vêşanîye û bibê vengê înan.”&nbsp;

	&nbsp;

	Rayberê PKKyî Abdullah Ocalano ke Îmraliyî de binê şertê giranan yê tecrîdî de yo, 33 aşmî yo keye û avûkatanê xo reyde nêeşkeno pêvînayîş bikero. Zîndanê Tirkîya û Kurdistanî de tepişteyê siyasî 27ê teşrîna peyêne de bi waştişê ‘Abdullah Ocalanî rê azadî problemê kurdî rê çareserî" grevê vêşanîye yê bê dore dayî destpêkerdiş û do heta 15ê Sibate dewam bikero.&nbsp;

	&nbsp;

	Binpaykerdiş, teda û veşênayîşê înfazan&nbsp;

	&nbsp;

	Îdarekara Partîya Têduşt û Demorasîye ya Şaran (HEDEP) a Amedî Serra Bucake da zanayîş ke no demêk dergo ke zîndanan de serê tepişteyan de teda û binpaykerdişê heqan yenê ciwîyayîş û no sîstem çîyê ke zerre de keno teber de zî keno û wina vat: “Na teda û hêrişê serê zîndan û şaran girêdayeyê tecrîdê Îmraliyî yo. Tecrîdê Îmraliyî serê heme zîndanan de tesîr kerdo. Sebebê ci no yo ke îdarekarê zîndanan tecrîdî ra hêz gênê û caardişê kêfî yenê rayîr ra berdiş. Teber de zî na teda zêde bîya.”

	&nbsp;

	‘Ganî ma veng bidê grevê vêşanîye’&nbsp;

	&nbsp;

	Serraye dîyar kerd ke ganî tecrîd bi temamî bêro şikitiş û vengê tepişteyê grevê vêşanîye de teber de bêro eşnawitiş û vat ke no xeylê muhîm o. Serraye wina dewam kerd: “Partîyê sîyasî, rêxistinê komelê sivîl, rêxistinê heqan ganî vengê tepişteyan ê grevî de bidê eşnawitiş. Ancax bi no hawa ma eşkenê probleman çareser bikerê. Ma venga heme rayaumûmîye kenê ke paştîdayîş bidê xoverdayîşê zîndanan û bibî vengê înan.”

	&nbsp;

	‘Ma do tecrîdî bişikinê’&nbsp;

	&nbsp;

	Hemsereka DBPyî Amedî Sultan Yaraye zî ard ziwan ke xoverdayîşê vera şikitişê tecrîdê serê Rayberê PKKyî Abdullah Ocalanî newe nîyo û wina vat: “Seke ma her tim vanê tecrîd tenê serê Birêz Ocalanî de nê serê heme tepişteyan û komelî de yeno rayîr ra berdiş. Tepişteyan ser de caardişêk keyfî est o. Tay tepişteyî 30 serrî yo tepişte yê û vera nê tahlîyekerdişê înan yeno taloqkerdiş û înfazê înan yeno veşênayîş. Şarê kurdî vera tedayan de têkoşîn keno. Bi seserran o bîyayîşê kurdan çinî ameyo hesibnayîş. Ma do tecrîdî bişikinê. Ma bi israr û qerar ê. Ganî şarê kurdî wayîrê nê xoverdayîşî bivejîyo û na koletîye ra xilas bibo.”

	&nbsp;