
Dadîya Dîcle Muftuoglu: Nêeşkenê vengê çapemenîya azade bibirnê 

2023-12-04 10:50:11


	&nbsp;

	Rojda Aydin

	&nbsp;

	AGIRÎ - 1ine roniştişê dewaya Hemsereka DFGyî û edîtora MAyî Dîcle Muftuogluye 7ê Kanûne de yeno dîyîş. Dadîya Dîcleye dîyar kerd ke bi destbendkerdiş û tepiştişan nêeşkenê vengê çapemenîya azade bibirnê û venga tewrbîyayîşê roniştişî kerd.&nbsp;

	&nbsp;

	1ine roniştişê Hemsereka Komeleya Rojnamegeran a Dîcle Firatî (DFG) û edîtora Ajansê Mezopotamyaye (MA) Dîcle Muftuogluya ke çarçeweya tehqîqatê Anqaraye de 3yê Gulane Roja Azadîya Çapemenîye ya Dinya de ameybî tepiştiş, do 7ê kanûne de 5ine Mehkemaya Cezaya Girane ya Amedî de bêro viraştiş. Dîcleya ke Zîndanê Girewte yê Cinîyan ê Sîncanî de tepişîyena "endamîya rêxistine" û "awankerdiş û rayraberdişê rêxistine" ra yena sûcdarkerdiş.&nbsp;

	&nbsp;

	Dadîya Dîcleye, Necla Muftuogluye derheqê kênaya xo de ajansê ma JINNEWSî rê qisey kerd û waştişê serbest verdayîşê aye kerd.&nbsp;

	&nbsp;

	‘Dîcleye vera zilmî de vejîya’&nbsp;

	&nbsp;

	Neclaye dîyar kerd ke her tim vera çapemenîya azade de zilm estbî û nê zilmî ra zî her tim xeberdar bî. Neclaye ard ziwan ke heta nika xeylê reyna derheqê Dîcleye de tehqîqat ameyo akerdiş wina vat: “Na dewlete çi biwaza kena. La ganî bêro zanayîş ke ne Dîcle û ne zî ma qet fek têkoşînê xo ra vera nêdanê. No zilmo ke kurdan rê yeno kerdiş rê ma vanê êdî bes o.”

	&nbsp;

	'Ez xoverdayîşê Dîcleye ra sereberz a’&nbsp;

	&nbsp;

	Neclaye da zanayîş ke ganî vera zilmî de bivejê û vengê xo berz bikerê û wina vat: “Dîcleye vera nê zilmî de waşt ke vengê xo berz bikera û bî rojnameger. La kênaya mi bi hawayêkê bê huqûq û bîla sebeb ameye tepiştiş. Ma Dîcle se kerda? Tena qelema Dîcleye estbî. Qelema xo û nuşteyanê xo vera ameye tepiştiş. Ez xoverdayîşê aye ra sereberz a. Dîcle ziwanê xo vera ameye tepiştiş.”

	&nbsp;

	‘Seba ke vengê înan bibirnê tepiştî’&nbsp;

	&nbsp;

	Dadîya Dîcleye Neclaye dîyar kerd ke destbendkerdiş û tepiştişan ra wazenê ke vengê çapemenîya azade bibirnê, la bi tepiştişan nîno birnayîş. Neclaye derheqê babete de wina vat: “Hevalê Serdar 13 aşmî yo bê suc û bîla sebeb zîndan de yo. No zilmêk gird o. Abdurrahman Gok, Sedat Yilmaz û embazê bîn heme bîla sebeb ameyî tepiştiş."

	&nbsp;

	&nbsp;'Dîcleye bi kelepçeyan berdî nêweşxane'&nbsp;

	&nbsp;

	Derheqê teda û zilmo ke zîndanan de hemverê tepişteyan de yeno kerdiş de zî Neclaye wina vat: “Dîcle nika Zîndanê Sîncanî de ya. Uca de xeylê problemî est ê. Yew aşmî ra ver nêweş kewta û aye bi kelepçe berdî nêweşxane. La Dîcle bi kelepçekerde muayene qebul nêkerda. Reaksîyon mojnaya û semedo ke muayene qebul nêkerda aye tepîya berdî zîndan. Sewbîna hetê dayîşê kitaban de zehmetîyan vejenê. Seba ke ma hîsgêr nêbê ma rê zêde qalê probleman nêkena. La ma bi rayîrê televîzyonî musenê ke problemê înan est ê.”

	&nbsp;

	‘Vengê çapemenîya azade nîna birnayîş’&nbsp;

	&nbsp;

	Neclaye qiseykerdişê xo yê peyênan de waştişê serbestverdayîşê Dîcleye û heme rojnamegerê tepişte kerd û wina qiseykerdişê xo peynî kerd: “Tu sucêk înan çin o. Coka ra zî ganî bi lezkî serbest bêrê verdayîş. Ez wazena heme rojnamegerê tepişte serbest bêrê verdayîş. Seba ke vengê înan bêra birnayîş ewro mîyanê çar dêsan de yê. Bi tepiştişan vengê înan nîno birnayîş. Ê zîndan de hîna zêde karê xo kenê. Vengê çapemenîya azade qet nîna birnayîş. Ê yew kes bitepişê, des kesê bîn do herinda înan pir bikerê."

	&nbsp;

	&nbsp;

	&nbsp;

	&nbsp;

	&nbsp;