'Vera tecrîdî de ganî xeta têkoşînî bêra hîrakerdiş’  

2023-11-28 10:03:12


	 

	 

	Oznur Deger

	 

	MÊRDÎN - Verfeka Meclîsê Cinîyan a DBPyî Berîvan Bahçeciye bale ant serê ‘Rayîr ra Şîyayîşê Azadîye’ ya ver bi Gemlîkî û vat: “Do vera sîstemo ke tecrîdî bi ma dano ferzkerdiş têkoşînêk bêro dayîş û têkoşîn zî do bi serkêşîya cinîyan pê bêro.” 

	 

	33 aşmî yo ke Rayberê PKKyî Abdullah Ocalanî ra tu xeberêke nîna girewtiş. Vera tecrîdî û xebernêgirewtişî de 18ê Teşrîna Peyêne de bi sloganê ‘Rayîr ra Şîyayîşê Azadîye’ ver bi Gemlîkî ra hetê partîyê sîyasî û dezgehê sivîlî ra rayîr ra şîyayîş ame organîzekerdiş. Bi seyan hemwelatijî bajarê Kurdistan û Tirkîya ra tewrê rayîr ra şîyayîşî bîyî. 

	 

	Çalakîyê vera tecrîdî Kurdistan û Tirkîya hema zî dewam kenê. Verfeka Meclîsê Cinîyan a Partîya Herêmê Demokratîke (DBP) Berîvan Bahçeciye ajansê ma JINNEWSî rê qala tesîrê tecrîdî û muhîmîya ‘Rayîr ra Şîyayîşê Azadîye’ kerd. 

	 

	Vera tecrîdî de hîrakerdişê xeta têkoşînî 

	 

	Berîvane dîyar kerd ke no proses bi Rayîr ra Şîyayîşê Gemlîkî dest pênêkerd û wina dewam kerd: “Kombîyayîşê şarî yê ke hetê DBPyî ra, TJAye ra û HEDEPyî ra ameyî organîzekerdiş de nê waştişî vejîyayî raşte. Tena hemverê Birêz Ocalanî de nê hemverê pêroyê beşê komelî yê Kurdistan û Tirkîya de tecrîdêk gird est o. Seba çinîkerdişê tecrîdî ganî xetêka têkoşînî bêra munayîş. Na xete zî bi munaqaşayê şarî vejîya raşte. Na rewşe şarî reyde ame munaqaşakerdiş û qerar ameyî girewtiş. Êdî tena tecrîdê Îmraliyî nê ganî tecrîdê hemverê cinî, komel û ekonomîye bêrê rijnayîş." 

	 

	'Rijnayîşê tecrîdî nê amanc azadîya fîzîkî yo' 

	 

	Berîvane dewamê qiseykerdişê xo de bale ant serê rayîr ra şîyayîşê 9ê Teşrîna Verêne û vat: “Rayîr ra şîyayîş de zî ma dî ke waştiş tena rijnayîşê tecrîdî nîyo, waştiş azadîya fîzîkî ya Birêz Abdullah Ocalanî yo. No vengêk hempar bî. Dima ra rayîr ra şîyayîşê Gemlîkî vejîya raşte. Rayîr ra şîyayîşê Gemlîkî rayîr ra şîyayîşêk muhîm bî, xebatêka hempar bî û coka ra zî rayîr ra şîyayîşêk ercaye bî. Vera her tewir astengî û tedaye de şar xo resna Gemlîkî. Kişta înan de zî atmosferêko pozîtîf ame awankerdiş. No çî seba ma dest pêk bî. Ma do sey DBPyî rol û mîsyonê xo bîyarî ca. Seba ma babeta yewine tecrîd o û şikitişê tecrîdî nê azadîya fîzîkî ya. Ma do na çarçewa de kar û xebatê xo bidî rayîr ra berdiş.”

	 

	'Do xebatê xo hîna hîra bikerê’ 

	 

	Verfeka Meclîsê Cinîyan a DBPyî Berîvane tewr peynî da zanayîş ke bê şarî tu çîyêk serkewte nêbeno û wina peynî ard: “Seba hîrakerdişê xeta têkoşînî do xebatê ma dewam bikerê. Cinî komel dîzayn kena. Nê semedî ra zî sere de cinî yena ke têkoşînê xo yê rijnayîşê tecrîdî aver bera."