Gumeya Sakî ke keda cinîye açarîyena berardişê cuye 

2023-11-02 10:42:49


	 

	 

	Zelal Tunç

	 

	WAN - Gumeya Sakî de cinî barê giran yê karî açarnenê keda kolektîf. Şit, berardişê şitî, goz û hengimîne çimeyê esasî yê îdareyê înan ê û her aşamayê viraştişê gidayan de cinî esta. 

	 

	Gumeya Sakî ya girêdayeyê dewa Kaçîdî ya ke 5 kîlometre Şûbeyê Wanî ra dûrî ya, çar hetê ci bi koyan ra pê yeno û 100 keyeyî gume de estê. Rayîrê dewe zî xeylê zehmetin û bi wîrajin o. rayîrê gume bi daranê gozan xemilîyeno. Dewijî tarîx baş nêzanê la vanê ke kal û pîrê înan tîya de ameyî dinya. Keyeyê ke gume de yî zafane bi kerpîçan ameyî viraştiş û qîlê koyî de yê. Keyeyê dewijan di odeyin û di qatin ê û qatê binî de axur esto. 

	 

	Berê keyeyan ewnîyenê yewbînan ra

	 

	Sere de dewe de keyeyêk tene bîyo û dima ra zêde bîyî. Nika 100 keyeyê gume de ciwîyenê. Keyeyê gume bi hawayêkê ke berê înan biewno yewbînan ameyî viraştiş. Çimeyê îdareyê înan hengimîn, heywankarî û goze yê. Hema hema heme barê giran ê karî serê milê cinîyan de yo.

	 

	Aşmê tewr weş 

	 

	Gumeya Saka de barê giran ê berardişî bi kedêk kolektîf ameyo parekerdiş. Cinîyê dewe ra Makbule Semoye dîyar kerd ke dimayê nimajê serê sibayî areyî hadre kenî û dima ra bi pezê xo reyde eleqedar benê. Makbuleye vat ke amadekarîya zimsitanî aşmê wisarî de kenî û wina vat: “Aşmê wisarî zaf dewlemend ê. Ma şinê zozanan. Ma pincar arê danê. Ma aşmanê wisarî de di reyan heywananê xo doşenê. Ver bi payîzî şit çin o. Ma wisar zar penîr virazenê. Şitê zêde ma Wan de roşenê merdim û dostanê xo.”

	 

	Pîya xebetîyenê Makbuleye da zanayîş ke pê şitê pezê xo mast, penîr û runê keyeyî virazenê û vat ke xebata gume zehmetin a la bi hemkarîye xebate kenê û vat: “Ma pîya xebetîyenê û bi dore xebetîyenê.”

	 

	‘Bi abîyayîşê mektebî reyde kar di qat beno’ 

	 

	Nejla Semoye zî ard ziwan ke wextê înan çin o ke tay boya xo bidî û vat ke bi heywan û çinitişî reyde meşgul benê. Nejlaye wina dewam kerd: “Zafane ma lazimîyanê xo bi xo kenê. Çimeyê îdareyî yê gume ra yew zî goz ê. La emserr zaf kêm bî. Karê dewe zehmetin o. Bi abîyayîşê mektebî reyde kar di qat bî. Krîzê ekonomîye vera ma qaseyê keda destê xo heqdest nêgênê. Ma berardişê sey şit, sebze û hengimîne roşenê û pê werdê bînan herînenê. Tewreyê ardî bîyo 600 TL. Krîzê ekonomîye vera ma zaf zehmetîyan ancenê. Zimistan zaf serdin o. Rayîr yenê girewtiş. Cereyan her tim birîyeno. Coka ra zî ma gidayê xo yê sey ard, run, şekir û yê bînî zêde herînenê. Cuya dewe weş a la zehmetin a.”