
‘Cigêrayîşê zitî parçeyêk şerê taybetî yo’  

2023-11-01 09:57:27


	&nbsp;

	&nbsp;

	ÊLIH - Serranê peyênan de yew binpaykerdişê heqan yê tewr zêde ke yeno rojeve cigêrayîşê zitî yo. Endama Meclîsê Ciwanan a HEDEPî Elîf Yalçine derheqê babete de qisey kerd û da zanayîş ke cigêrayîşê zitî parçeyêk polîtîkayê şerê taybetî yo.&nbsp;

	&nbsp;

	Yew cayê ke tewr zêde binpaykerdişê heqan tede qewimîyeno zîndan ê. Zîndanan de îşkenceyê cigêrayîşê zitî pê yeno. Îqtîdar her çend ke înkar bikero zî hem zîndanan de û hem zî wextê destbendkerdişî de tepişteyan ser de cigêrayîşê zitî yeno ferzkerdiş. Xeylê tepişteyî bi muracatan û rayîrê huqûqî cehd kenê ke nê caardişan bîyarî rojeve. Cinîyan derheqê îşkenceyê cigêrayîşê zitî de reaksîyonê xo ardî ziwan.

	&nbsp;

	‘Amanc kenê ke tepişteyan bê hêz vera bidê’&nbsp;

	&nbsp;

	Endama Meclîsê Ciwanan a Partîya Têduştî û Demokrasîye (HEDEP) Elîf Yalçine da zanayîş ke cigêrayîşê zitî raşt nîyo û girêdayeyê tecrîdî yo. Elîfe wina dewam kerd: “Cigêrayîşê zitî bi taybetî tepişteyê sîyasîyan ser de yeno ferzkerdiş. Amanc kenê ke tepişteyan bê hêz vera bidê. Cigêrayîşê zitî binpaykerdişê heqî yo. No nîno qebulkerdiş. Caardişêk xirab yê serê merdiman tesîrêk travmatîk awan keno. Sewbîna cinîyê digane û cinîyê ke wextê reglî de yê, heta pedê înan yeno cigêrayîşkerdiş. No şîdetêk gird o.”&nbsp;

	&nbsp;

	‘Parçeyêk şerê taybetî yo’&nbsp;

	&nbsp;

	Elife qiseykerdişê xo yê peyênan de dîyar kerd ke cigêrayîşê zitî parçeyêk polîtîkayê şerê taybetî yê dewlete yo û wina peynî kerd: “Ma şîyî kongreyê HEDEPî yê 15ê teşrîna verêne. Wextê cigêrayîşî de cêbê mi de ped dîyî. Mîyanê her kesî de ped vetî û heta yew bi yew vetî û vatî ke mîyanê ci de çi esto. Ma na rewşe qebul nêkenê. Ma xeylê tesîr benê. La embazê ma yê tepişte tebî hîna zêde tesîr benê. Ma do her tim vera nê caardişan de bê. Seba ke nê caardişî peynî bibê ma têkoşînê xo dewam kenê.”

	&nbsp;

	‘Ganî vera nê çîyan de vindertişêk bêro mojnayîş’&nbsp;

	&nbsp;

	Mamosteya kurdî Mîne Karataşe zî dîyar kerd ke xeylê cinîyî cigêrayîşê zitî reyde rî bi rî manenê û vat: “Nezaret de yan zî wextê şîyayîşê zîndanî de cigêrayîşê zitî cinîyan rê yeno ferzkerdiş. No nizdîbîyayîşêk bêhuqûqî yo û adîlane nîyo. Ez sey cinîyêke nê caardişan qebul nêkena. Ganî ma vera nê caardişan de nizdîbîyayîşê xo bimojnê.”

	&nbsp;

	‘Ma cigêrayîşê zitî sey tacîz vînenê’&nbsp;

	&nbsp;

	Verfeka Federasyonê Komeleyê Paştîdayîşê Keyeyê Tepişteyan (MED TUHAD-FED) Emîne Kayaye zî reaksîyonê xo ard ziwan û dîyar kerd ke cigêrayîşê zitî binpaykerdişê heqan o û na rewşe sey tacîzî biname kerd û vat ke şeklê nê cigêrayîşî travmayêk gird awan keno. Emîneye wina dewam kerd: “No caardiş polîtîkayê pelçiqnayîşî yo. Wexto ke rojnameger yan zî sîyasetmedar yenê tepiştiş bi kutikan hêrişê înan kenê. Seba ke bikewê zerre verê çimanê tutan de beran gênê û kewenê zerre. Nezaret de ma vengê qîrayîşan eşnawit, problemê werd û şimitişî ame ciwîyayîş. Nê çîyê ke mi hûmarte heme binpaykerdişê heqan ê.”

	&nbsp;