Zimistan seba mexduranê erdlerzî zehmet derbaz beno!  

2023-10-30 09:48:24


	 

	 

	 

	AMED - Hemsereka Odeya Mîmaran a Amedî Selma Aslane da zanayîş ke dimayê erdlerzê 6ê Sibate îqtîdar qels mendo û mexdurîyetê şarî çareser nêkerdo. 

	 

	6ê Sibate de merkezê ci Mereş de erdlerzêk pê ame û 11 bajaran ser de tesîr viraşt. Bi des hezaran kesî erdlerz de dinyaya xo bedilnayî, bi hezaran awanîyî rijîyayî û zirar dîyî. Rijnayîşê awanîyê xisardîyayeyî zî hema dewam keno. Nê bajarê ke tede rijnayîş dewam keno ra yew zî Amed o. Hemsereka Odeya Mîmaran a Amedî Selma Aslane derheqê tabloya ke dimayê erdlerzî vejîya raşte de qisey kerd.

	 

	 ‘Wexto ke awanî yenê rijnayîş tedbîr nînê girewtiş’ 

	 

	Selmaye da zanayîş ke selahîyetdarî ge-ge derheqê awanîyê ke xisar dîyî de eşkerayî dayî û vat: “Goreyê dayeyê destê ma de Amed de 800 awanîyî ameyî vengkerdiş û do bêrê rijnayîş. Awanîyê ke îhaleyê înan ameyo kerdiş zî hema rijnayîşê înan dewam keno. No rijnayîş ge-ge ame rojeve. Ame vatiş ke wexto ke yenê rijnayîş ganî tedbîr bêro girewtiş. Bi taybetî zî hetê weşîye ra. Semedo ke wexto ke yenê rijnayîş ganî awdayîş zî bêro kerdiş ke dorme nêbo herre. Ma dumanê rijnayîşî ancenê zerreyê xo û na rewşe bena sebebê nêweşîyan. Tede her tewir kîmyasal esto. Merkez de 800 bi temamî zî 5 hezar û 100 awanîyî ganî bêrî rijnayîş.”

	 

	 ‘Hemparbîyayîş çin o’ 

	 

	Selmaye wina dewam kerd: “Tirkîya herêma erdlerzî ya. TMMOB ge-ge derheqê babete de eşkerayî dano. Ma pêroyê Amedî de xebata rayîr ra benê û çîyê ferz vanê. Ma bi rayîrê çapemenîye pare kenê. Ma raporan hadre kenê, la bi selahîyetdaran reyde pêvnayîş, herînayîş û dayîş, fikir û hemkarî nêvirazîyeno. Dimayê Wan û Îzmîrî 6ê Sibate de erdlerzêk pê ame. Erdlerzî ra ver TMMOB rapor hadre kerdbî.” 

	 

	Bajarî seba erdlerzî hadreyî acaba? 

	 

	Selmaye qiseykerdişê xo yê peyênan de bale ant serê netîceyê cidî yê erdlerzî û vat ke vera hende erdlerzan tedbîr nînê girewtiş û wina vat: “Dimayê erdlerzî ma vat do tay bedilnayîş pê bêrê. La nika erdlerzêk pê bêro acaba bajar semedê erdlerzî hadre yê. Tu hadreyî nêame kerdiş. Ma emanetê Homa ciwîyenê. Zafane awanîyê xisarin yenê rijnayîş û vengkerdiş. Mexdurîyetê şarî dewam keno. Problemê starbîyayîşî esto. Şar xeymeyan rona. Roja yewine de ma vat ke xeymebajarî baş nîyê, kişta çemî de awankerdişê konbajarî do netîceyê cîyayan bivejno raşte. Ma bi rayîrê nuştiş û çapemenîye pê hesna la kesêk çiman ver de nêgirewt. Cehd kerdî zemîn baş bikerê. Cehd kerdî problemê roşnkerdişî çareser bikerê. Xeylê xebatî ameyî kerdiş. Şertê demserre xirab bîyî. Coka ra zî mecbur mendê ke çareser bikerê. Hetê Nêweşxaneyê Cigêrayîş û Perwerdeyî de konteynir viraştî. La vernîya ma de zimistan o û do mexdurîyet zêde bibo.”