‘Rolê Abdullah Ocalanî muhîm o’ 

2023-10-29 13:20:29


	 

	 

	Marta Somek

	 

	STENBOL - “No tecrîdê serê Abdullah Ocalanî bi rastî tecrîdê aştîye yo. Cigêrayoxe, Nuştoxe, Sîyasetmedare û yew îmzakarê Deklerasyona “Venga Aştîye” Prof. Dr. Fatma Gok, dîyar kerd ke tecrîdê serê Abdullah Ocalanî tecrîdê serê aştîye yo. Fatma eynî wextî de ard ziwan ke ganî çareserî bi şarê Tirkîya û Kurdistan reyde bêro caardiş û venga pêro pêameyê komeleyî kerd ke semedê aştîye bikewê tevger.

	 

	Kurdistan de pêwa polîtîkayê şerî û hêrîşan ke dewam kenê, Rayberê PKKyî Abdullah Ocalan ke 25 serrî yo Girawa Îmraliyî de binê tecrîdêk girankerde de yeno girewtiş tu agahî çin a. Hemverê nê polîtîkayan vizêr 78 kesê ke îmzakarê heme hetan ra yê û mîyanê înan de xeylêk akademîsyenî, sîyasetmedarî, hunermendî, nuştoxî, rojnamegerî û roşnvîrî zî estê bi nameyê “Venga Aştîye” Otela Elit Word a Taksîmî de eşkerayîyêke dayî çapemenîye.

	 

	Her het ra eleqeyêk estbî 

	 

	Salona ke pankartê bi sloganê "Venga Aştîye" amebi daliqnayîş xeylêk rojnamegerê ke mîyan de yê wareyê mîyaneteweyî de zî estbî amade bî. Heto bîn ra xeylêk akademîsyenî, sîyasetmedarî, hunermendî, nuştoxî, rojnamegerî û roşnvîrê ke metnê deklerasyonî îmza kerdî, sewbîna avûkayê Buroyê Hiuqûqî yê Asrînî yê ke Rayberê PKKyî Abdullah Ocalan pawenê, hemserek û endamê Şubeyê (OHD) yê Stenbolî, Verfekê Partîya Tevgerê Kede (EHP), Verfekê Partîya Herêmê Demokratîke (DBP) yê Marmarayî, Hemserekê Partîya Şorişgêr, Komeleya Elewiyê Demokratîke (DAD), xeylêk temsîlkarê sazgehê sivîl û sîyasetmedarî zî tewr bî.

	 

	Adresê çareserî dîyar o: Abdullah Ocalan! 

	 

	Metnê eşkerayîye de ame dîyarkerdiş ke çareserîya demokratîke ya problemê kurdî de muxatabo bingehîn Abdullah Ocalan o û awankerdişê aştîye de rolê ey xeylêk muhîm o û wina ame vatiş: “Hewldayîşê ma serê cigêrayîşê aştîye û ma wazenê bibê raywanê aştîye. Ma a bawerî de yê ke Ocalan semedê komelbîyayîşê aştîye ke semedê Tirkîya wayîrê muhîmîyêk tarîxî yo, wayîrê rolêk muhîm o. Îmzakaran venga pêro pêameyê komelî kerdî ke waştişê xo yê aştîye bîyarê ziwan û pîya têkoşîn bikerê. Îmzekaran ra cîgêrayoxe, nuştoxe, sîyasetmedare û Prof. Dr. Fatma Gok zî vat, “Lazim o şar vengê xo berz bikero û bikewo mîyanê tevgerê ke senîn bi aşitî laver şino, ne bi çeke û şer. Ez hêvî kena ke no vengdayîş do girseyê pîlêr seferber bikero. Heta ke ma aştîye pê nîyarê, ma fek têkoşîn ra vera nêdanê.”

	 

	Ma serê lazimîya aştîye, israrê çareserîya demokratîke ya problemê kurdî, rolê sereyîn yê Rayberê PKKyî yê çareserî de û vengdayîşê ey ser o mîkrofonê xo dergê Fatma kerd.

	 

	'Şarê kurdî bi Raybertîya xo yeno '

	 

	Heto bîn ra Fatmaye da zanayîş ke tecrîdo mutlaq ê serê Rayberê PKKyî Abdullah Ocalanî serê pêroyê şarê kurdî de zî yeno rayîr ra berdiş û vat: “No tecrîdê serê Abdullah Ocalanî bi raştî tecrîdê serê aştîye yo. Semedo ke şarê kurdî bi Raybertîya xo yeno ‘cezakerdiş’. No raştîyêk o. eke hêzê şerî bi no hawa aver şêrê, no yeno na mana ke bi raştî zî sey prosesê çareserîye yê 2013-2015î Abdullah Ocalan eşkeno çareserî û şeklêk cîya bido komelî. Şarê Tirkîya zî do pîya seba çareserîye têbigêrê. Şarê Tirkîya vera nê de vejîya, tu kesêk vera Prosesê Çareserîye de nêvejîya. La şer bi serkewt, hêzê îqtîdar û hukmatî o wext prosesê aştîye peynî kerdî. No çî verê çiman de qewimîya û tarîxêk nizdî xeylê çîyan bi ma da mojnayîş. Dimayê înan ma vînenê ke feqîrî zî zêde beno.”

	 

	Waştişê aştîye de israr kenê! 

	 

	Fatmaye dîyar kerd ke îna her tim venga aştîye kerdî û vat: “Wexto ke Kongreyê Demokratîke ya Şaran ame awankerdiş ma kampanyayêk gird da dest pêkerdiş. Mi vat ‘Seba çareserîye dîyalog, seba cuye aştî’. La hetê tewr krîtîk no yo ke ma do senî komelkî bikerê. Seba nê karî merdim zaf muhîm lazimê ke ganî proses rayîr ra berê. Sebahat Tuncel kesa ke na kampanya organîze kerde û ked daye ya. Serra 2014î de seba komelbîyayîşê aştîye ma Anqara de kombîyayîşêk organîze kerd. Nê pê nêame. Semedo ke kesê ke nê karî wazenê zaf xurt ê û hêzê înan esto ke bi haletanê xorî yê dewlete vengan bibirnê. Nika ma do se bikerê? Ma do nê çîyî biresnê bi temamî cayêk cîya. Tebî qet şik çino ke seba nê zî ma bi hawayêkê xurt ganî bixebetê û waştişê xo yê bi israr ê aştîye zêde bikerê.”

	 

	'Venga seba aştîye danê eşnawitiş’ 

	 

	Fatmaye qiseykerdişê xo yê peyênan de vat ke seba çareserîya problemê kurdî û aştîye rolê Rayberê PKKyî Abdullah Ocalanî ke 33 aşmî yo tu xeberêk ci ra nîno girewtiş, zaf muhîm o û vat: “Ganî ma bikewê têgêrayîş mîyan û têbigêrê. Bi her kesî reyde komelbîyayîş vejenê merheleyêk bîn û venga heme pêameyoxan kena ke venga seba aştîye bieşnawê.”