‘Kampanyaye vera hêrişanê serê cinî û xozaye de cewab a’  

2023-10-27 11:23:26


	 

	 

	 

	ÊLIH - Endama Meclîsê Şaredarîya Heskîfî Zozan Şîmşeke da zanayîş ke vera hêrişê îqtîdarî de seba ke keda cinîye bidê asîyayîş û vajê êdî bes o kampanya dayî destpêkerdiş û vat ke bi na kampanyaye reyde cewab danê hêrişan. 

	 

	Bi destê îqtîdarî Kurdistan de bi taybetî serê cinî û tutan de teda pê yena. Îqtîdaro ke azadîya cinîyan sey tehdîd vîneno, vera têkoşîno ke yeno dayîş de polîtîkayê şerê taybet keno dewre. Na çarçewa de Têgêrayîşê Cinîyê Azade (TJA) vera tecrîd, şer, şîdet û krîzî de bi siloganê ‘Bi Jin Jiyan Azadî reyde ver bi azadîye’ kampanya da dest pêkerdiş. Kampanya 15ê êlule de Riha de ame deklerekerdiş û dima ra zî 20ê êlule de qezaya Silopî ya Şirnexî de startê ci ame dayîş. 

	 

	Endama Meclîsê Şaredarîya Heskîfî ya Êlihî Zozan Şîmşeke derheqê kampanyaya TJAye de qisey kerd.

	 

	 ‘Amac no yo ke keda cinîye bêra mojnayîş’ 

	 

	Zozane dîyar kerd ke çarçeweya kampanya de Êlih de 6ê teşrîna verêne de start dayî û 21-22yê teşrîna verêne de festîvala kulturê cinîyan pê ardî. Zozane wina vat: “Demê peyênan de polîtîkayê şerê taybet yê îqtîdarî, qirkerdişê cinîyan, qirkerdişê xozaye, qirkerdişê sîyasî, ekonomî, fuhuş û tîryakî zêde bîyî. Bi amancê vernîgirewtişê înan, bi amancê keda cinîye bêra dîyîş ma na kampanya da destpêkerdiş."

	 

	 ‘Ganî cinî her demî ra hîna zêde paştîdayîş mîyan de bî’ 

	 

	Zozane dewamê qiseykerdişê xo de nê çîyan ard ziwan ser: “Her cayê dinya de sîstemê serdest ê camêrdî bi bahaneyê cîyayan cinîyan qetil keno. Ma nimûneyan vînenê. Semedo ke porê Jîna Mahsa Emînîye asîyayêne ameye qetilkerdiş. Zîhnîyeto serdest ê camêrdî serê bedenê cinîye de xo wayîrê heq vîneno. Werdê cinîyan ra bigîrê heta kincê înan dewleta camêrd qerar dana. Afganîstan de Talîban heme heqê cinîyan dest ra gêno. Samaliye de rêxistinê Boko Haramî nêverdeno cinî destê xo bida kitaban. Tutanê kênayan mekteban ra remneno û qetil keno. Ma cinîyî ganî vera nê hêrişan de vinderê. Welatê ma de Peymana Stenbolî ame feshkerdiş. Nika hewl danê Desturêk Bingehîn a newe bivejnê. No zîhnîyeto tarî Êlih de zaf zêde ca bîyo. Vera nê de ma festîvala xo viraşt.”

	 

	 ‘Nasnameyê cinîya azade hedefê îqtîdarî de yo’ 

	 

	Zozane ard ziwan ke cinîya azade komelê azad o û wina dewam kerd: “Îqtîdar azadîya cinîye ra terseno. Her tim wazeno cinî binê kontrolê înan de biba. Welat de kişta cinîyan de xoza zî binê tehlukeyêk gird de ya. Seba hêrişê hemverê xozaye û tarîxî ez eşkena Heskîfî nimûnê bimojna. Îqtîdar Heskîfî kerd binê awe. Heskîf bajarêk zaf cîya bî. Raşteyan de her ke bi asanî eşkayêne bigêro. La nika raşteyê Heskîfî de kesê herême ra nînê dîyîş.”

	 

	 ‘Fuhuş zêde bîyo’ 

	 

	 Zozane qiseykerdişê xo yê peyênan de vat: “Demê peyênan de kişta qetilkerdişê cinîyan de hedîseyê fuhuşî zî zêde bîyo. Dewlete seba înan çîyêk nêkena. Rayîr înan rê akena. Hema hema her raşteyê bajarî de fuhuş esto. Tîryak yeno şixulnayîş. Emrê şixulnayîşî heta tutîye kewto. Festîvala ke ma pê ard vera nê çîyan de bî. Ma cinî heta peynîya kampanyaye ma do raşteyan de bibê. Ganî heme cinî wayîrê kampanyaye bivejê. Ma do bi na kampanyaye reyde cewabêk gird bidê îqtîdarî.”