
Dewaya rojnamegeran de şahido eşkera: Polîsan nuşt, mi zî îmza kerd!  

2023-10-26 14:41:22


	&nbsp;

	&nbsp;

	ANQARA - Dewaya rojnamegeran de Huseyîn Durudenîz sey şahido eşkere ameybî goşdarîkerdiş. Şahido eşkera Huseyîn dîyar kerd ke rojnamegeran nêşinasneno û derheqê îfadeyanê xo yê yewbînan nêtepişnenê de wina vat: “Polîsêk nuşt. Dima ra açarnayî dosya û mi rê ardî. Mi zî îmza kerd.”&nbsp;

	&nbsp;

	Mudira Karê Nuşteyî ya Ajansa Mezopotamyaye (MA) Dîren Yurtsever, rojnamegerê MAye Bêrîvan Altan, Ceylan Şahînlî, Denîz Nazlim, Emrullah Acar, Hakan Yalçin, Selman Guzelyuz û Zemo Aggoz, rojnamegerê JINNEWSî Habîbe Eren û Oznur Deger û Mehmet Gunhano ke demêk buroyê MAye yê Anqaraye de sey stajyer xebetîyabî, 7 aşman zîndan de mendî û 16ê gulane de serbest ameyî verdayîş. Hîrine roniştişê dewaya rojnamegeran ke bi îdîayê “endamtîya rêxistine” ameybî akerdiş, 4ine Mehkemaya Cezaya Girane ya Anqaraye de ame dîyîş. Rojnamegerê MAye Denîz Nazlim û Hakan Yalçinî tewrê avûkatanê xo roniştiş de hadre bî.&nbsp;

	&nbsp;

	Temsîlkarê Hemserekê Komîsyonê Huqûq û Heqanê Merdiman a Partiya Têduştî û Demokrasîye ya Şaran (HEDEP) Berpirsîyar Ozturk Turkdogan, endamê Komeleya Huqûqnasê Seba Azadîye (OHD) û temsîlkarê Komeleya Cigêrayîşê Medya û Huqûqî (MLSA) û Basin-Îşî zî roniştiş de hadre bî.&nbsp;

	&nbsp;

	Şahido eşkera Huseyîn Durudenîzî reya yewine Zîndanê Kandiraye ra bi rayîrê Sîtemê Veng û Dîmene (SEGBÎS) tewrê roniştişî bî. Şahido eşkera vat ke o nêzano têkilîya kam ci rojnamegerê MA û JINNEWSî bi ‘rêxistine’ reyde esto ya nê. Şahid vat ke rojnamgerê ke yenê muhakemekerdiş nêşinasneno, kesê ke tewrê rêxistine benê nameyê înan yê ‘kod’ esto coka ra nemeyê raşt ê rojnamegeran nêzano. Durudenîzî dewamê qiseykerdişê xo de vat: “Nê rojnamegerî &nbsp;bi pere xebetîyenê. La rêxistine de zerrîwazî esas o.”&nbsp;

	&nbsp;

	Nê mabenî de serekê mehkema fotografê rojnamegeran mojna û waşt ke Huseyîn Durudenîzî înan teşhîs bikero. Avûkat Ozgur Erol vera nê caardişî de îtîraz kerd û vat: “Eke kerdox nika ra ver teşhîs nêkerdo, ganî babeta teşhîsî raşt bêra kerdiş. Serê fotografêk de teşhîskerdiş nîno kerdiş.”&nbsp;

	&nbsp;

	Serekê mehkema zî fek teşhîskerdişê fotografan ra verda û vat: “Binê îfadeyê ci de îmzeyê ci esto. Qey nakokîyêk winasî vejîya raşte?” huseyîn zî nê persî rê wina cewab da: “Wexto ke mi emnîyet de îfade dayêne, fotografan mojnayî mi. Nê mabenî de kesêk zî asayîş ra nuştêne. Îxtîmalo ke ez nê nuşteyî bivîna çin o. Dima ra kerdî dosya, mi rê ardî û mi zî wina îmze kerd.”&nbsp;

	&nbsp;

	Avûkate Şevîn Kayaye makînayê fotograf û komputerê ke sereştişê keyeyan yê 25ê teşrîna verêne ya 2022yî de ameyî destronayîş û hema nêameyî dayîş ard vîr û waşt ke seba dayîşê înan kelepulan maben de qerar bêro dayîş.&nbsp;

	&nbsp;

	Mehkema qerar da ke materyalê dijîtal ê rojnamegeran vera hukmî de bêrê dayîş, seba ke Huseyîn teşhîskerdişê rojnamegeran bikero Mudirîya Asayîşî ya Anqaraye ra nuşte bêro nuştiş û roniştiş taloqê 18ê çeleyê 2024î kerd.

	&nbsp;