Amed de atolyeyê îdarekarîya herêmî ame viraşti 

2023-10-19 15:17:31


	 

	 

	AMED - Heyetê Cinîyan ê Îdarekarîya Herêmî yê HEDEPyî, semedê munaqaşakerdişê polîtîkayê cinîyan ê herême atolye viraşt. 

	 

	Heyetê Cinîyan ê Îdarekarîya Herêmî yê Partîya Têduştî û Demokrasîyî yê Şaran (HEDEP), Plazayê Kalenderî yê qezaya Bajarê Neweyî yê Amedî de atolye viraşt. Cinîyî verê ke 11ê Teşrîna Peyêne de Anqara de ‘Konferansê Cinîyan ê Îdarekarîya Xoserî yê Demokratîke’ pê bîyarê Amed de Atolyeyê ‘Lîberalîzm û Rêxistinbîyayîş’ pê ardî. Xeylê kesî tewrê atolye bîyî û atolye Şûbeyê Odaya Muhendîsan ê Amedî de ame viraştiş. 

	 

	Do bi qerarê ke ameyî girewtiş şêrê konferans 

	 

	Qiseykerdişê akerdişî yê atolyeye hetê Hemşaredara Bajarê Newe ya Amedî Belgin Laçin Dikene ra ame kerdiş. Belgine da zanayîş ke înan ver de weçînayîşêk esto û ganî cinî bi hawayêkê xurt tewrê weçînayîşî bibê û wina dewam kerd: “Ma embazê xo yê cinîyan reyde kewtî mîyanê xebatêke xurt ê derheqê prosesî de. Ma xebata xo bi atolyeyan da destpêkerdiş. Ma Amed, Serhed û Botan de dest bi xebatan kerd. Bi qerarê ke ameyî girewtiş ma do şêrê konferansî. Ma bi fehmê zelal ê cinîyan tewrê weçînayîşê şaredarîyan benê." 

	 

	'Seba ke ma hîna xurt bibî ma dest bi atolyeyan kerd' 

	 

	Endama Heyetê Cinîyan a Îdarekarîya Herêmî ya Demokratîke ra Rozerîn Îldane dima ra qisey kerd. Rozerîne zî wina vat:"Do goreyê fehmê cinîya azade proses aver şêro. Ma do serê rêxistinbîyayîşî munaqaşayanê xo bikerê. Semedo ke ma hîna xurt bibê ma dest bi atolyeyan kerd.” 

	 

	Dimayê qiseykerdişan atolye çapemenîye rê girewte dewam kerd.