
Rojnamegerê ke vera çapemenîya serdeste de rêça heqîqetê de yê 

2023-10-15 10:26:42


	&nbsp;

	&nbsp;

	Elfazî Toral

	&nbsp;

	STENBOL - Vera çapemenîya îqtîdar ke serdestîye berz kena, bedenê cinîye teşhîr kena û kerdoxan pawena de rojnamegerê cinî bi kalemê cinîye rêça heqîqetî de do her tim bibê...&nbsp;

	&nbsp;

	Çapemenîya îqtîdar ya ke şîdet, destdergê û tacîzê vera cinîyan weş mojnena, herinda ke kerdoxan teşhîr bikera, xeberanê ke cesaret dana kerdoxan virazena. Çapemenîya hetgir bi ziwanê şîdetî hemverê cinî û tutan de xeberan virazena û dişmentîya hemverê cinîye meşru kena. Çapemenîya hewzî ke nêtêduştîya cînsê komelî roj bi roje giran kena, bedenê cinîye zî teşhîr kena û dewamê zîhnîyetê serdest ê magazînelî dewam kena.&nbsp;

	&nbsp;

	Şer de cinî û tutî&nbsp;

	&nbsp;

	Bi seserra yo şerê ke pê yeno de cinî û tutî tewr zêde tesîr bîyî. Herêmê şer de mîyanê şertê giran ê cuye de têkoşînê cuye danê û kesê ke tewr zêde birînan gênê cinî yê. Şerê ke zîhnîyetê serdest vejenê de kesê ke ewil yenê hedef girewtiş reyna cinî yê. Bedenê cinîye yena teşhîrkerdiş û serê dîmenê şîdet û îşkenceyî de rojnamegerî yena kerdiş.&nbsp;

	&nbsp;

	Kam pey ziwanê destdergîye de esto?&nbsp;

	&nbsp;

	Nimuneyê peynî yê rojnamegerîye hêrişê Hamasî yê Îsraîlî ke dabî destpêkerdiş de vejîya raşte. Hemwelatija Alman cinîya bi nameyê Shanî Louke bado ke ameye qetilkerdiş bedenê aye ameye teşhîrkerdiş. Ca, wext û kerdoxî bibedelê zî şer de her tim cinî yena hedef girewtiş. Hêrişan de cinî û tutî yenê îşkencekerdiş û bedenê înan yenê teşhîrkerdiş. Çapemenîya ke nê çîyan bi asanî kena, ziwanê tecawuzî xeberan de zêde şuxilnena.&nbsp;

	&nbsp;

	Rayîrê çapemenîya serdest&nbsp;

	&nbsp;

	Dîmenê Shanîne serê çapemenîya komelkî de demêk kilm de ame weşanayîş û îşkenceyo ke bi Shane ameybî kerdiş tebîî qet şik çin o ke hetê çapemenîya hetgire ra esasê ‘rojnamegerîya reytîngî’ de ame dîyîş. Rojnameyê Cumhurîyetî sernameyê ‘Cesedê kesê ke tewrê festîvale bîyî ameyî vetiş, kesê ke tewrê festîvale bîyî qala hovîtîye kerdî’, rojnameyê Posta sernayê ‘Her kes vatêne qey do bimirê’, NTV ‘Hunermenda Alman Shanî Louke ya ke Hamasî aye remnabî acaba ciwîyena?’, rojnameyê Serbestiyet ‘Partî bi kabusî qîra’, mîllîyet ‘Dinya aye bado ke kewte destê Hamasî nas kerd’ eştî. Çapemenîya hetgir bi manşetanê xo sînor nêverda ke îşkence û qirkerdişî normal bikero.&nbsp;

	&nbsp;

	Tebîî qet şik çin o ke verê ke Shanî zî xeylê nimuneyan ma dîbî. 10ê Tebaxa 2015î de qezaya Gimgimî ya Mûşî de Ekîn Wan ( Kevser Elturk) pêrodayîşêk de dinayaya xo bedilnabî. Bedenê Ekîne ameybî teşhîrkerdiş. Nê qewimîyayîşê teberê merdimîye de çapemenîya hetgir rîyê xo reyna mojnabî. Zîhnîyeto ke a roje vejîya raşte ewro zî dewam keno. Tu kerdoxêk nêame teşhîrkerdiş û ne name û ne zî peynameyê înan nêame dayîş. Çapemenîya hetgir herinda ke kerdoxan teşhîr bikera înan pawena.

	&nbsp;

	Cinî serê şopê heqîqetî de yê...&nbsp;

	&nbsp;

	Ajansê xeberan ê cinîyan JINNEWS ke parçeyêk adetê çapemenîya azade yo vera çapmenîya hetgir û zîhnîyetê serdestî de bi qelema cinîye xeta heqîqetî de rojnamgerîye keno. Vera çapemenîya îqtîdar ke serdestîye berz kena, bedenê cinîye teşhîr kena û kerdoxan pawena de rojnamegerê cinî bi qelema cinîye rêçe heqîqetî de do her tim bibê...

	&nbsp;