Destbendkerdişî ra heta zîndanî îşkence 

2023-10-13 13:58:04


	 

	 

	 

	ANQARA - Hetkara serekîy pêroyî ya DBPyî Zekîye Îlbasane protestoyê 9ê teşrîna verêne komployê mîyanneteweyîye de ameybî destbendkerdiş û tepiştiş. Verfeka Meclîsê Cinîyan ê DBPyî Aynur Saricaye da zanayîş ke Zekîye wexto ke ameya destbendkerdiş hetê polîsan ra ameya tacîzkerdiş û dekewtişê zîndanî de cigêrayîşê zitî kerdê û koxuşê edlî aye rê ameyo ferzkerdiş. 

	 

	Amed de derheqê 9ê teşrîna verêne komployê mîyannteweyîye yê hemverê Rayberê PKKyî Abdullah Ocalanî çalakîyê protestokerdişî pê ameybî û çalakîyan de xeylê kesî ameybî destbendkerdiş. Înan ra yew zî Hetkara serekîya pêroyî ya DBPyî Zekîye Îlbasane bî. Zekîye 10ê teşrîna verêne de bi îdîayê ‘cewab daya polîsan’ ameye tepiştiş. Ame zanayîş ke Zekîyeye hetê polîsan ra ameya tacîzkerdiş û şîdet bi aye ameyo kerdiş. 

	 

	Verfeka Meclîsê Cinîyan a Partîya Herêmê Demokratîke (DBP) Aynur Saricaye derheqê babete de qisey kerd. 

	

	Aynure da zanayîş ke bi serkêşîya KCD, TJA û DBPyî 8ê teşrîna verêne de Stenbol de, 9ê teşrîna verêne de Amed de vera tecrîdî de vejîyayî raşteyan û bi hêzê faşîzmî reyde ke tecrîdî giran keno, ameyî rî bi rî. Aynure wina vat: “Zîhnîyetê serdest yo ke wazeno tecrîdî giran bikero, xo sey barîkat û hêzî vet aver. Amed û Stenbol de bi hêrişan xo da mojnayîş. La ma bi qerardarî ke têkoşînê xo gird bikerê.” 

	 

	‘Embazê ma bi tacîzî reyde ameyî rî bi rî' 

	 

	Aynure wina dewam kerd: “9ê teşrîna verêne de ma Amed de ameyî têkişt. La raşte girîyabî binê abluqa. Dest bi destbendkerdişan kerdî. Embazê ma girewtî binê abluqa. Vatî vila bibê. Dimayê nê zî embazê ma bi derbkerdişî ameyî destbendkerdiş. Polîsê camêrdî ameyî cinîyan ser de. Hêzê fîzîkî şuxilnayî. Polîsê camêrdî embazê ma yê cinîyan destbend kerdî û tacîz kerdî.” 

	 

	Emnîyet de zî tacîz û şîdet 

	 

	Aynure qiseykerdişê xo yê peyênan de bale ant serê tacîzkerdişê Zekîye Îlbasane û wina qedênaye: “Embaza ma Zekîye benê wesayîtê destbendkerdişî. Embaza ma hewl dana vernîya destbendkerdişê kesêk kal bigêra. A mabêne de hetê polîsê camêrdî ra yena tacîzkerdiş. Embaza ma Zekîyeye vana ke aye ameya tacîzkerdiş û dima ra ameya derbkerdiş. Temamê destbendkerdişî de teda bi aye yena kerdiş. Embaza ma semedo ke verçimikê aye çinî bî nêwazena zabitname îmze bikera. Temamê wextê destbendkerdişî de yena derbkerdiş. Sewqê cezaya sulhî yena kerdiş. Qerarê tepiştişî yeno dayîş. La koxuşê edlîyan bi aye yeno ferzkerdiş. Embaza ma îtîrazê nê çîyî kena û bi tena aye kenê hucre. Asayîşê tepişteyê siyasî koxuşê edlî de çin o. Ma nê çîyî zelal vanê. Embaza ma Aynure wexto ke benê zîndan cigêrayîşê ruturepalî bi aye yeno ferzkerdiş. Cigêrayîşê zitî caardişêk teberê merdimîye yo. Nê çîyî qebul nêkena. Ma do înan caardişan bidê teşhîrkerdiş û her tim teşhîr bikerê. Ganî embazê ma bi lez serbest bêrê verdayîş.”