
Tahsîskerdişê Keyeyê Dengbêjan yeno manaya çinîkerdişê kulturî 

2023-10-05 09:49:09


	&nbsp;

	&nbsp;

	Nazlican Nûjîn Yildiz

	&nbsp;

	WAN - Şaredarîya Cizîrî Keyeyê Dengbêjan tahsîsê Mudirîya Perwerde yê Mîllî kerd, dengbêje Sîsê Şaybak dîyar kerd ke bi nê çîyî wazenê şarê kurdî û kulturê kurdî çinî bikerê.&nbsp;

	&nbsp;

	Qeyûmê ke mabenê serranê 2016-2019î de tayînê şaredarîyê Partîya Demokratîke ya Şaran (HDP) ameyî kerdiş, xespkerdişê heqan dewam keno. Qeyûmo ke tayînê şaredarîya Cizîrî ya Şirnexî bî, Keyeyê Denbêjan yê tarîxî seba ke sey Lîseyê Hunerê Weşik bêro şixulnayîş tahsîsê Mudirîya Perwerde yê Mîllî ameybî kerdiş. Keyeyê Dengbêjan verê cû zî bi tayînkerdişê qeyûman ameybî îstîmlaqkerdiş. Qerarê derheqê tahsîskerdişî de bahaneyê ‘Ercê hunerî goreyê dorme pê nîno’ ame mojnayîş.&nbsp;

	&nbsp;

	Dengbêje Sîsê Şaybake derheqê rewşe de ajansa ma rê qisey kerd û dîyar kerd ke hemverê dezgehê kurdan de hêriş esto û vera her çîyî kurd payan ser de yê.&nbsp;

	&nbsp;

	Dengbêje Sîsêye da zanayîş ke dengbêjî hêzê merdimîye yo û kulturê kurdî yo û vat: “Dengbêjî eynî wext de heskerdiş û meraqî ra yeno. Kesêk meraq nêkero nêeşkeno bibo dengbêj. Seba mi dengbêjî wina yo. Kulturê dengbêjiye xeylê muhîm o.”

	&nbsp;

	‘Ma paweyê weçînayîşê şaredarîye yî’&nbsp;

	&nbsp;

	Sîsêye qiseykerdişê xo de dîyar kerd ke hewl yeno dayîş ke kulturê kurdî bêro çinîkerdiş û vera nê caardişan de şarê kurdî nêeşkeno bêro çinîkerdiş û wina dewam kerd: “Bi serran o hemverê destkewtiş, kultur, ziwan û cuya kurdan de hêriş esto. La reyna zî şarê kurdî payan ser de yo. Ez wazena şarê kurdî kiştayewbînan de ca bigêro û vera çinîkerdişî de têkoşîn bikero. Qeyûm vano ‘Ez keyeyê dengbêjan nêda perwerde yê mîllî do reyna bêrî tîya de keyeyê dengbêjan akerê’. Nêwazenê kurdî xo rê ca akerê. La ma payan ser de yê. Ma paweyê weçînayîşê şaredarîye yê. Ma do reyna ser bikewê.”

	&nbsp;

	‘Kulturê kurdî hedef yeno girewtiş'&nbsp;

	&nbsp;

	Sîsêye ard ziwan ke dimayê tayînkerdişê qeyûman xeylê ca ameyî girewtiş û wina qiseykerdişê xo peynî kerd: “Wexto ke cinî yenê têkişt derheqê kulturê xo de qisey kenê. Derheqê derdanê xo de qisey kenê. La ê nêwazenê kes bêro têkişt. Ê wazenê goreyê xo kurdî awan bikerê. Wazenê ke kurdî yewbînan çinî bikerê. Tahsîskerdişê Keyeyê Dengbêjan hedefgirewtişê kulturê kurdî yo."

	&nbsp;

	

	&nbsp;