
Mergê şikin zêde benê  

2023-10-02 14:04:08


	&nbsp;

	&nbsp;

	COLEMÊRG - Hemsereka ÎHDyî ya Colemêrgî Sîbel Çapraze derheqê mergê şikin û şîdetê serê cinîyan yê Colemêrgî ke zêde bîyo de qisey kerd û da zanayîş ke komîsyonêk awan kerdî ke sebebê mergê şikin cigêrayîş bikero û şinê zîyaretê keyeyan û vat: “Seba mergê şikin zêde nêbê ma do têkoşîn bikerê.”

	&nbsp;

	Kurdistan û Tirkîya de mergê şikin zêdîyeno. Goreyê dayeyê şîdetî yê ke çapemenîye de ca gênê tabloyê şîdetê serê cinîyan her ke şino hîra beno û çapemenîye de tena ca dîyeno qismêk şenik ê hedîseyan. Polîtîkayê bêcezaverdayîşî û fînayîşê cezaye vernîya her tewirê şîdetî akeno. Heto bîn de zî binê nameyê ‘întîxarî’ de mergê şikin ê cinîyan zêde deno. Bajarê ke demê peyênan de tede mergê şikin zêde bîyo ra yew zî Colemêrg o.&nbsp;

	&nbsp;

	Hemsereka Komeleya Heqanê Merdiman (ÎHD) a Colemêrgî Sîbel Çapraze derheqê mergê şikin û şîdetê serê cinîyan de ercnayîş kerd.

	&nbsp;

	‘Ma şinê zîyaretê keyeyan’&nbsp;

	&nbsp;

	Sîbele dîyar kerd ke bi rêxistinê komelê sivîlî reyde seba cigêrayîşkerdişê mergê şikin ê cinîyan komsîyon awan kerdî û ard ziwan ke serra peyêne de Colemêrg û qezayanê ci de mergê şikin ê cinîyan zêde bîyo. Sîbele wina dewam kerd: “Derheqê na babete de ma yew komîsyonêk awan kerd ke xebatan bikero. Ma sey komîsyonî şinê zîyaretê keyeyê cinîyan ê ke dinyaya xo bedilnayî. Tabî raşt nîyo eke ma mergê şikinî ni zîyaretêk reyde girê bidê. Ma sey herême biewnê, problemê ekonomî û komelî estê. Komîsyonê ma semedo ke hema xebatanê xo temam nêkerdo, xebata raşteyan dewam kena. Colemêrg û qezayanê ci de ma vînenê ke mergê şikin netîceyê polîtîkayê şerê taybetî de pê yenê. Na babete de wezîfe tena yê ÎHDyî nîyo. Ganî heme STOyî reyde xebate bêra rayîr ra berdiş.”

	&nbsp;

	‘Bêvengî dewam kena’&nbsp;

	&nbsp;

	Sîbele dewamê qiseykerdişê xo de dîyar kerd ke bado ke xebatê komsîyonî peynî bibê do derheqê mergê şikin de raporêk bi rayaumûmîye reyde pare bikerê û wina dewam kerd: “Sere de mercîyê dewlete vera nê caardişan de bêhîs mendî. Her ke mergê şikin zêde beno bêvengî dewam kena. Ma semedo ke dezgehî bikewê mîyanê têgêrayîşî xebate rayîr ra berd. Walîtî bado ke întîxar zêde bî, bi tewrbîyayîşê dezgehê fermî kombîyayîşêk pê ard. Çîyo ke ganî biameyêne kerdiş no bî ke ganî mudirîya xizmetê komel û weşîye xebat bikerdêne. Ma vera nê caardişan de bêveng nêmendî. Ma dest bi xebatan kerd.”

	&nbsp;

	‘Wa mergê şikin pê nêrê’&nbsp;

	&nbsp;

	Sîbele qiseykerdişê xo yê peyênan de veng da û vat: “Ma venga STO û hemwelatijê Colemêrgî kenê ke bi keyeyan reyde bikewê mîyanê paştîdayîşî. Bado ke cinîyêke bi hawayêkê şikin dinyaya xo bedilna zî ganî ma hewl bidê heqanê aye bigîrê. Semedo ke mergê şikin pê nêrê ma do têkoşîn bikerê.”

	&nbsp;

	&nbsp;

	

	&nbsp;