'Heta serekê ma nêvejîyo azadî mumkun nîya’  

2023-09-19 10:53:33


	 

	 

	Rozerîn Gultekîn

	 

	STENBOL - Dadîyê ke vera tecrîdê Îmrali û vera polîtîkayê qirkerdişî yê şarê kurdî ke bi serran o têkoşîn danê û cenazeyê merdimanê xo gêrenî, dîyar kerdî ke aştî bi azadîya fîzîkî ya Rayberê PKKyî Abdullah Ocalanî mumkun a. Dadîyî venga her kesî kerdî ke mîyanê têkoşînî de ca bigîrê. 

	 

	Awankerdişê Komara Tirkîya ra nata polîtîkayê îmha, çinîhesibnayîş û qirkerdişî vera şarê kurdî de dewam kerdî û hetê hukmatê AKP-MHPyî ra no 20 serrî yo ke polîtîkayî bêmaben dewam kenê. Eynî wext de bi polîtîkayê sey vilakerdişê madeyê tîryakî, fuhuş, tacîz û tecawuzî bi taybet vera cinî û tutan ra pratîkê xo yê şerê taybetî yê vera şarê kurdî pêroyê Kurdistan û Tirkya de dewam keno. Tecrîdê serê Rayberê PKKyî yê Îmraliyî ke nê polîtîkayan ra yew o zî bêmaben dewam keno. Rayberê PKKyî Abdullah Ocalan serra 1999î de netîceyê komployê mîyanneteweyîye de ame tepiştiş û 24 serrî yo Girava Îmraliyî de binê tecrîdî de yo. No tecrîd her ke şino vilayê pêroyê komelî beno. 

	 

	Vera îşkenceyê dewlete de cinîyê laçik sipe... 

	 

	Yew nimuneyê somut yê tecrîdî nizdîbîyayîşê ‘dişmentî’ yê vera cenazeyê şarê kurdî yo. Mîyanê nê nizdîbîyayîşan de xeylê caaerdişê îşkenceyî yê sey remnayîşê cenazeyan, nêşirawitişê mele, nêberdişê cenazeyan bi teyareyan, canêardişê wecîbeyê dînî û nêverdayîşê definkerdişî yo. Dadîyê ke bi serran o vera heme polîtîkayê şer û tecrîdî de raşteyan de mîyanê pêrodayîşî de yê, tena aştî wazenê û amacê têkoşînê înan aştî yo. Ma mîkrofonê xo dergê dadîyê ke bi serran o cenazeya tutanê xo gêrenê û bê têkoşîn danê, kerd. 

	 

	5 serrî yo cenazeya lajê xo gêrena 

	 

	Melîke Înceya ke 5 serrî yo esteyê lajê xo gêrena dîyar kerd ke dewlete bi tecrîdî polîtîkayê xo yê dişmenîye dewam kena. Melîkeye dîyar kerd ke adresê çareserîye Rayberê PKKyî yo û wina vat: “No 2 serrî yo tu kes Rayberî ra xebere nêgirewto. Ma nêzanê weşîya ci senî ya. Sîstem nêverdeno ke ma ci ra xeberêke bigîrê. Seba kesê ke wazenê şêrê û pêvînayîş pê bîyarê her tim astengîyan vejenê. Ma nê tecrîdî qebul nêkenê û ma do tecrîdî peynî bikerê. Eke tecrîdê serê Rayberî peynî bibo do aştî vilayê heme dinya biba. Seba tirk, kurd, ereb û çerkezan do qewimîyayîşê baş bivirazîyo. Zilmo ke bi ma ameyo kerdiş bes o. Lajê mi serra 2018î de hewteyê yewine de hêrişê Efrînî de şehîd bî. Heta ke ez bimira ez do waştişê cenazeya lajê xo bikera. Ma qebul nêkenê ke tutê ma goristananê bêkesan de bêrî definkerdiş. Ma şer nêwazenê, wa dadî nêbermê. Heme tepişte û Rayberî wa azad bibê.” 

	 

	'Seba ke şar nefes bîgîro ganî tecrîd bêro wedaritiş!’ 

	

	Rewşan Gunera ke bi serran esteyê birayê xo gêraye, dîyar kerd ke aşma Êlule aşma aştîye ya la şer bi şîdetin dewam keno. Rewşane ard ziwan ke heme krîzê welatî sere de zî krîzê ekonomî şer vera vejîyayî raşte û vat: “Êdî na herre de edalet û demokrasî nêmendo. Sebebê ci zî no yo ke şar nêeşkeno cuya hempar biciwîyo û problemê kurd çareser nêbeno. Tecrîdê mutlaq vera no 2 serrî ra zêde yo ke tu xeberêk Rayberê PKKyî Abdullah Ocalanî ra nîna girewtiş. Ganî tecrîd wextêk lez de bêro wedaritiş û êdî şar nefesêk bigêro. Eke tecrîd peynî bibo ma do sey komele mîyanê aştî û asayîşî de biciwîyî. Ez vanga her kesê ke nê welatî ra hes kenê kena ke seba aştîye bîyarê welat hewl bidê." 

	 

	Tecrîdê Îmraliyî tesîr serê cenazeyan de zî keno

	 

	Rewşane dîyar kerd ke cenazeya birayê aye nêdîyaya înan û wina vat: “Caardişê dewlete de çîyêk bi nameyê exlaqî çin o. Bi ercê Kurdan kay kenê. Tecrîdê Îmraliyî serê girewtişê cenazeyan de zî keno. Birayê mi zî şehîd o. Cayê definkerdişî hîrê reyan ame bedilnayîş. Cenazeya ci sere de Bedlîs de ame definkerdiş û dima ra berdî Goristanê Garzanî. Dima ra nê xebera ma Kilyosî de defin kerdî. Ma cenazeya xo wazenê, la nêdanê ma.”

	 

	'Heta ke serekê ma nêvejîyo azadî pê nîna!' 

	 

	

	Medîha Înceya ke bi serran o seba aştîye têkoşîn kena, sebebê israrê îqtîdarîyê AKP-MHPyî polîtîkaya şerî de bêtehamulîyê hemverê şarê kurdî de ercna.  Medîha dîyar kerd ke hewl danê şarê kurdî çin bikerê û vat: “Netîceyê qebûlnêkerdişê ma de esteyê tutanê ma bi torbeyan ma rê şirawenê. No bêînsanî yo. Verê zî ma ameyî tepiştiş, zext û îşkencekerdiş. La ma tu wext çîyê winasî nêdîbî. Ma bi AKPyî reyde bî şahidê nê caardişan. No şermêk pîl o.” Heto bîn ra Medîha da zanayîş ke hêrişê bi çekê kîmyewî yê Kurdistanî dewam kenê û wina vat: “Merdiman kişenê, yanî hovîtî kenê. Hemverê nê de ma zext, hêriş, top û tifinganê înan ra nêtersenê. Heta dilopêke gonîya ma bimana ma do serê lingan de bê. Ma nê zulmî qebûl nêkenê. Heta ke serekê ma nêvejîyo û ma serê masa de nênişnê ro azadî nîna."

	 

	'Ma nê zulmî peynî bikerê' 

	 

	Medîha venga şarê kurdî kerd û vat, “Ganî her kes wurzo serê lingan, xo bipawo û koletî qebûl nêkero. Ganî şarê ma keyeyê xo de nênişno ro. Heta kengî do cenazeyê şehîdan bêrê? Torbe de şirawitişê cenazeyê şehîdan pêro komelî rê mesajêk o. Wa şarê ma bibo yew û nê zulmî peynî bikero. Wexto ke serekê ma azad bibo, do azadî zî bêro.”

	 

	'Vera hêsiran gonî çimanê dayîkan ra varena' 

	

	Hanim Keskîna ke bi serran o fek têkoşînî ra vera nêdaya zî dîyar kerd ke seba peynîkerdişê şerî û veradayîşê tepişteyanê sîyasî yê ke zîndan de yê, ê bi israr ê ke aştîyêke bi rûmet awan bikerê. Hanime ard ziwan ke dayîkî têkoşînê xo yê aştîye de bi qerar ê û vat: “Ganî ma hetkarîya yewbînan bikerê, zindanan birijinê û tepişteyan bivejê. Ganî êdî dayîkî nêbermê. Ma çîyêk xirab nêwazenê. Ma aştîye wazenê. Seba ke tu agahî Îmraliyî ra nîna, şer roj bi roje tewr giran beno. Ganî kurdî xo ver bidê. Eke ma bibê yew do no şer peynî bibo. Ganî ma hemverê zulmî peyser game nêerzê. Bes o. Vera hêsiran gonî çimanê dayîkan ra varena. Ma bi israr vanê aştî, aştî, aştî."