2ine Kampa Hamnanî ya Têgêrayîşê Sosyalîst peynî bî  

2023-09-07 10:06:03


	 

	 

	Melîke Aydin

	 

	ÎZMÎR - 2ine Kampa Hamnanî ya Têgêrayîşê Cinîyê Sosyalîstî ya ke bi sloganê ‘qanûn raşteyan de yenê nuştiş, xoverdayîşî gird bike xo rêxistin bikere’ virazîya de cinîyan xo nas kerd û hetê xobîyayîşî de îrade mojnayî. 

	 

	Têgêrayîşê Cinîyan ê Sosyalîstî yê Îzmîrî Kampa Şaredarîya Foçaye ya 2ine Kampa Hamnanî ya Cinîyan pê ard. Cinîyan kampe de atolye, panel pê ard û fîlm temaşe kerd. Cuya kolektîfî ame honayîş. Organîzatorê kampe ra yew Sîbel Yaşare derheqê kampa ke bi sloganê ‘qanûn raşteyan de yenê nuştiş, xoverdayîşî gird bike xo rêxistin bikere’ virazîya de ercnayîş kerd.

	 

	‘Ma bi qerarê neweyî kampe ra agêrayî’ 

	 

	Sîbele da zanayîş ke serra verêne kampe yewine Karaburunî de pê ame û qerarê awankerdişê yewîya cinîye û taxa Guzeltepe ya qezaya Çîglîyî de awankerdişê Komeleya Paştîdayîşê Cinîyan a Guzeltepeye dayî û nê qerarî emserr pê ardî. Sîbele ard ziwan ke emserr zî bi qerarê neweyî kampe ra agêrayî û wina vat: “Goreyê serra verêne tewrbîyayîş zêde bî. Ma sey destkewtişî vînenê. Ma menfîetê kapîtalîzmî vatî. Ma heme eynî probleman ciwîyenê. Ma bi di wesayîtan şîyî û bi cinîyan reyde raşte de ameyî têkişt."

	 

	Cuya kolektîf ame honayîş 

	 

	Sîbele sewbîna dîyar kerd ke kampe de xebatê kolektîfî ameyî rayraberdiş û vat: “Ma xeymeyanê xo pîya awan kerd. Ma werdê xo pîya viraşt, çayê xo pîya dem kerd. Zafane cinî bi tutanê xo reyde ameybî. Ma pîya tutan reyde eleqedar bîyî. Kampe de cinîyan destê xo dayî yewbînan û nizdî ra yewbînan nas kerdî. Ma na het de atolyeyê merhaba pê ard. Ma bi atolyeyê sloganî zî waştişê cinîyan, nizdîbîyayîşê înan û vatişê înan yê serê sosyalîzmî vet raşte. Panelê ‘çîyo ke yeno ciwîyayîş şorişê cinîye yo’ de tesîrê kapîtalîzmî yê serê cinîyan, rolê cînsîyetî yê ke cinîyan ser de yenê ferzkerdiş û xoverdayîşê cinîyan ke yeno ciwîyayîş nîşanê înan da. Nimuneyê tewr weş Kobanê bî. Cinî keyeyê feodalî ra vetî û vera DAIŞî de xoverdayîşêk gird rayra berdî û hema zî dewam kenê. No şoriş sey şorişê cinîye yeno qalîkerdiş, îfadeyo somut yê talankerdişî bî. Ma cuya xo ra zî nimune mojna. Cinîyan paştî da ma. Ma derheqê çapemenî û cinîye de panel pê ard. Ma fikrê çapemenîye yê derheqê cinîyan ercna.”

	 

	 ‘Cinîyan xo nas kerd, waştî bibê kerdox’ 

	 

	Sîbele dewamê qiseykerdişê xo de ard ziwan ke atolyeyan tesîrêk pozîtîf cinîyan ser de kerd û wina vat: “Ma bi Mehtap Alîşane reyde atolyeya têgêrayîşî pê ard. Ma hewl da ke cinî bedenê xo nas bikera. Ma cinîyan ra persa ke kampe senî derbaz bîya. Kêfweşîyê xo ardî ziwan ser. Heta seba kampa zimistanî zî pêşnîyar estbî. Seba atolyeyan tewrbîyayîş kêm bo zî seba panelan zêde bî. No seba ma dayeyêk muhîm o. ma fîlm mojna.” 

	 

	 ‘Bedilnayîş raşteyan de pê yeno’ 

	 

	Sîbele qiseykerdişê xo yê peyênan de wina vat: “Ma vanê ‘qanûn raşteyan de yenê nuştiş, xoverdayîşî gird bike xo rêxistin bikere’. Ma nê çîyî bi israr vanê. Heta ke tay çîyî bibedelîyî. Tu çîyêk hema wina nîno verê merdiman. Ganî ma cinî vengê xo berz bikerê. Coka ra ma cinîyan dawetê raşteyan kenê. Ma mecburî paştîdayîş gird bikerê. Bedilnayîş raşteyan de pê yeno.”