Janê gerrî Zîndanê Sîncanî yê Cinîyan de vila bi 

2023-09-05 15:05:33


	 

	 

	ANQARA - Gerr, qawîşa tepişteyanê edlîyan ê şuxulnayîşî yê Zîndanê Cinîyan ê Sîncanî de dest pêkerd, mîyanê xeylêk tepişteyan de zî vila bî. Îdareyê zîndanî dîyar kerd ke gerr bi rayîrê gardîyanan vila bîyo. Îdareyê zîndanî tu tedbîr nêgirewto.

	 

	Zîndanê Cinîyan ê Sîncanî de janê gerrî vila bi. Goreyê xebera Ajansê Mezopotamyaye (MA) janê gerrî ke qawîşa tepişteyanê edlî ke yenê şuxulnayîş, dest pêkerd. Werdê ke  tepişteyanê edlî rê vila kenê, pakitî kenê û kantîn de şuxulênê ra xeylêk qawîşan rê vila bî. Heta nika xeylêk tepişteyî karantînayî de yê û vera karkerê ke werd vila kenê ê neweyî ameyê wezîfedarkerdiş. Îdareyê zîndanî ke despêkê gerrî de tu eşkerayî vila nêkerd, eynî wextî de tu tedbîr zî nêgirewtî. Gardiyana ke her hewte fîleya cilan qawîşan ra arêdana vat: "Zîndan de janê gerrî esto. Şima wazenê cilanê xo medê. Seba ke pêro cilî eynî makîne de yenê şûtiş." Gardîyana ke ma ci ra persa ke tedbîr girewtê yan nê, vat: "Xêrcê îqazkerdişê cilan tu tedbîrêk nêameyo girewtiş."

	 

	Nê prosesî de tepişteyêke seba birînêke paşta xo şî beşê dermatolojiyî yê Nêweşxaneyê Kampusê Zîndanê Sîncanî zî doktor vera ke testêk bikero, seba birîna aye teşhîsê gerrî da. Hewteyêk ameye karantînakerdiş, dima ra reyna test kerdî la vejîya ke janê gerrî nîyo.

	 

	Tepişteyan seba nê venga odaya tabîban û rêxistina heqê merdiman kerdî û waştî ke cigêrayîş bêro kerdiş û heyetêk bêro şirawitiş.