Şewatê Yunanîstanî de cenazeyê 20 koçberan ameyî vînayîş 

2023-08-23 14:35:25


	 

	 

	MERKEZÊ XEBERAN - Şewato ke Yunanîstan de vejîya, cenazeyê 20 kesê ke yeno texmînkerdiş koçber ê, sînorê mabêne Yunanîstan û Tirkîya de ameyî vînayîş.

	 

	Wezaretê Zerreyî yê Yunanistanî neql kerd ke tîmê adirtefênayîşî  cenazeyê 20 kesan, daristanê sînorê mabêne Yunanîstan û Tirkîya de dîyê ke netîceyê şewatî de pêro veşayê û şik yeno kerdiş ke koçber bê.

	 

	Sewbîna eşkerayîya wezaretî de ame dîyarkerdiş ke seba cigêrayîşê mabêne daristanan yê cenaze û birîndaran de tîmêk lezgînî ronayê û semedo ke koçberê ke daristan de bibê înan berê cayê asayîşî.

	 

	Eşkerayîya wezaretî de ame vatiş ke cayê ke cenazeyê veşnaye ameyê vînayîş, xeta derbazbîyayîşê bi qeçaxî yê koçberano ke Tirkîya ra derbazê Yunanîstanî benê û uca ra derbazê Ewropa benê.

	 

	Nêzdîyê di hewteyo ke adirêk hîra bi daristanê Yunanîstanî kewte û bi hezaran kesî semedê şewatî koçber bîyê û zîyanêk pîl resayo roniştoxê herêma şewatî.