Kombîyayîşê Cinîyan ê Zenûbya seba Abdullah Ocalanî veng da 

2023-07-30 13:11:46


	 

	 

	MERKEZÊ XEBERAN - Endama Meclîsê Kombîyayîşê Cinîyan a Zenûbya ya Reqaye Kînana El Ebdoye ard ziwan ke do vera tecrîdkerdişê Rayberê PKKyî Abdullah Ocalan û seba meşrukerdişê azadîya ci ya fîzîkî çalakîyan zêde bikerî.   

	 

	Dewleta tirke tecrîdkerdişêk giran vera Rayberê PKKyî  Abdullah Ocalanî de ferz kerda û no zêdeyê 29 aşmî yo ke nêvedena avûkat û keyeyê ci pêvînayîş pê bîyarî. Tewr peynî mektubê tehdîtî zî dayî ci. Hemverê înan caardişan de raksîyonê şarê Bakur û Rojhelatê Sûrîye û şarê Kurdistanî zêde benê. 

	 

	Goreyê xebera Ajansê Xeberan ê ANHAye Endama Komîteya Perwerdeyî ya Meclîsê Kombîyayîşê Cinîyan a Zenûbya ya Reqaye Kînana El Ebdoye tecrîdê serê Abdullah Ocalanî şermezar kerd. Kînanaye derheqê mektubê tehdîtî yê dewleta tirk û rayîrberanê zîndanê Îmraliyî ke dayî Abdullah Ocalanî de vat: "No tehdîtkerdiş zeyîf bî û tersê dewleta tirke ya dagirker ê hemver Rayber Abdullah Ocalanî nîşan dano."   

	 

	Kînana El Ebdoye bale ant serê xoverdayîşê Abdullah Ocalanî yê hemverê siyasetê dewleta tirke û wina dewam kerd: "Ma zanê ke Rayber Abdullah Ocalan goş nêdano nê siyasetan. Çike wayîrê fikrêk hîra yo. Nê mektubî ci ser de tesîr nêvirazenê.” 

	 

	Kînanaye derheqê çalakîyê girêdayeyê Kombîyayîşê Cinîyan ê Zenûbya yê vera tecrîdî de zî nê çîyan vat: “Ma do bi raybazanê cîyayan peymeyê têkoşînî berz bikerî û pêroyê herêmanê Bakur û Rojhelatê Sûrîyeye de rayraşîyayîş û çalakîyan pê bîyarî, eşkerayîyan bidî û bi rayîrê kombîyayîşê çapemenîye venga azadîya fîzîkî ya Abdullah Ocalanî bikerî. Het ke azadîya fîzîkî ya Rayber Abdullah Ocalanî pê bêra, ma do venga xo ya hemverê dewleta tirke ya dagirker û rayîrberîya zîndanê Îmraliyî newe bikerî.” 

	 

	Kînanaye tewr peynî venga pêroyê cinîyan kerd ke do hemverê sucê dewleta tirke de biherikî raşteyan, têkoşînê xo xurt bikerî, peynîya zextê dewleta tirke bîyarî, tecrîd peynî  bikerî û Abdullah Ocalanî bi fîzîkî azad bikerî.