
'Bi destkewtişê Şorişê Rojawanî do komelî bibedilnê’ 

2023-07-26 14:27:33


	&nbsp;

	&nbsp;

	Mîdye Miqted

	&nbsp;

	HELEB - Meclîsê Cinîyan ê Partîya Sûrîyeya Ameyoxî çarçeweya hemleya “Cinîya zana bingeyê awankerdişê keyeyê demokratîke ya” pêşangehêk resimî akerd. Cinîyê ke tewrê pêşangehî bîyî vatî: “Cinî, vera her tewirê hêrişî de bi destkewtişê şorişî do xo, keye û komelê xo bibedilna.”&nbsp;

	&nbsp;

	Meclîsê Cinîyan ê Partîya Sûrîyeya Ameyoxî 8ê Temmuze de hemleyêk sîyasî, komelkî yê yew aşmîyêke û nîme da pêhesnayîş. Çarçeweya na hemleye de, şûbeyê meclîsê Helebî bi sloganê ‘Cinîya zana bingeyê awankerdişê keyeyê demokratîke ya’ pêşangehêk resimî Parkê Efrînî yê taxa Eşrefîyeyî ya Helebî de akerd. Pêşangeh de 100 tabloyê bi babetê cîya cîyayî yê sey azadîya cinî, lazimîya yewbînan girewtişî, xelisnayîşê herêmê dagirkerde ameyî mojnayîş. &nbsp;

	&nbsp;

	Derheqê hemleya ‘Cinîya zana bingeyê awankerdişê keyeyê demokratîke ya’ de û pêşangehî de cinîyan ajansê ma JINNEWSî rê qisey kerd.&nbsp;

	&nbsp;

	Do xebat dewam bikera&nbsp;

	&nbsp;

	Sereka Partîya Sûrîyeya Ameyoxî ya bajarê Helebî Xalîde Ebdoye derheqê pêşangehî de qisey kerd û bale ant serê hêrişê hemverê cinîyan û wina vat: “Meclîsê Cinîyan ê Partîya Sûrîyeya Ameyoxî do çalakîyê cîyayan pê bîyaro. Na çalakîya peyêne nîya û ma do bi eynî şeklî rêzeçalakîyan pê bîyarê. Goreyê rewşa nika ke ma tede ciwîyenê, cinî yenê hedefgirewtiş. Bi taybetî zî cinîyê ke serkêşîye nê komelî rê kenê. Seba azadîya pêroyê cinîyan ma xebatanê xo dewam kenê. No hêriş zî hetê zîhnîyetê faşîst û dewleta tirke ra yeno kerdiş.”&nbsp;

	&nbsp;

	Mîyanê komelî de serkêşîya cinîye&nbsp;

	&nbsp;

	Xalîdeye dîyar kerd ke cinî serkêşîya şorişî kerd û wina peynîyê qiseykerdişê xo ard: “Heme raşteyan de cinî serkêşîye komelî rê kerd. Bi taybetî zî Şorişê Rojawanî de bi heme reng û vengê xo, xo hemverê dişmenî de îspat kerd. No xoverdayîş û destkewtişê ke cinî nê şorişî de dest fînayî seba dişmenî nêame qebulkerdiş. Heto bîn de demêk derg na rewşe mîyanê komelî de nêameye qebulkerdiş. Bi rojan o hemverê cinîyan de hêrişî qewimîyenê. Mîyanê keyeyî de hewl danê ke komel û keyeyêk demokratîke awan bikerê. Coka ra nê esasî ser de ma reyna venga heme cinîyan kenê ke xo bi rêxistin bikerê û zordarîye qebul nêkerê.”&nbsp;

	&nbsp;

	'Wa cinî xo nas bikerê’&nbsp;

	&nbsp;

	Endama Ofîsê Cinîyan a Partîya Sûrîyeya Ameyoxî Leman Şêxoye zî bale ant serê muhîmîya çalakî û bernameyê cinîyan û vat: “Bi sloganê ‘Cinîya zana bingeyê awankerdişê keyeyê demokratîke ya’ ma çalakîyanê xo virazenê. Heto bîn de çalakîyê sey panel û atolyeyan de ma amac kenê ke cinî heme hetan ra xo nas bikera. Cinîyê ke tutê înan estbî zî ganî goreyê nê zihnîyetî têbigêrî ke wa komelêk roşne bivejîyo raşte. Eke wina bêro kerdiş do averşîyayîş û bedilnayîş heme hetanê komelî de pê bêrê.”&nbsp;

	&nbsp;

	Resimê cinîyê serkêşî xêz kena&nbsp;

	&nbsp;

	Resame Rojîn Dewode zî tewrê pêşangehî bî û wina vat: “Ez zaf resim û xêzkerdişî ra hes kena. Komelê ma de tewr zêde cinî bi şîdetî reyde yena rî bi rî. La kişta hende çîyan de reyna zî mîyanê komelê ma ra xeylê cinîyê serkêşî zî vejîyayî. Ez zî wazena bi xêzkerdişê resimî wayîrê înan cinîyan bivejîya. Ez bi xêzkerdişê nê resiman xeylê kêfweş a.”&nbsp;

	&nbsp;

	&nbsp;

	

	&nbsp;