'Çapemenîya Azade ya kurdî nîna bêvengkerdiş'

2023-07-14 15:17:09


	 

	 

	Sema Çaglak

	 

	AMED - Rojnamegerê cinî yê ke ameyî tehlîyekerdiş, dîyar kerdî ke îqtîdar vejîyayîşê rastîyan ra aciz o û vatî, edlîye de yê ke ameyî muhakemekerdiş ê bî.

	 

	Çarçewaya cipersayîşê hetê Serdozgerîya Komare ya Amedî ke merkezê ci Amed bi, xeylêk bajaran de 8ê Hezîrana 2022yîne de serê keye û sazgeh û dezgehan eşt, 20 ci ra rojnamegerî 22 kesî ameyî destbendkerdiş. Kesê ke ameyî tepiştiş Mudura Karê Nuşteyî ya ajansê ma Safîye Alagaş, Hemserekê Komeleya Rojnamegeran ê Dîcle Firatî (DFG) Serdar Altan, Edîtorê Ajansê Mezopotamyayî (MA) Azîz Oruç, Mudurê Karê Nuşteyî yê Rojnameyê Xwebûnî Mehmet Alî Ertaş, rojnameger Zeynel Abîdîn Bulut, Omer Çelîk, Mazlum Dogan Guler, Îbrahîm Koyuncu, Neşe Toprak, Elîf Ungur, Abdurrahman Oncu, Suat Doguhan, Remzîye Temel, Ramazan Gecîken, Lezgîn Akdenîz û Mehmet Şahîn 16ê Hezîrane de dimayê ke vejîyayî dadgehe bi îdayê "endamîya rêxistine" ameyî tepiştiş. Roniştişê dewaya yewine 11ê aşme de ame vînayîş û dimayê 2 rojê ke edlîyeyê derbaz bî 15 rojnamegerê tepişteyî ameyî tehlîyekerdiş.

	 

	Rojnamegerê cinî derheqê hêrişê hemverê çapemenîya azade û serê tepiştişê xo de qisey kerdî.

	 

	‘Qîtîdar nêwazeno şar rastî bivîno'

	 

	Rojnamegere Remzîye Temel, dîyar kerd ke hêrişêk xidar serê çapemenîye esto û wina vat: "Bi serran o hêrişê hemverê çapemenîya azad dewam kenê. Ez û nêzdîyê 20 embazanê xo ameya destbendkerdiş û 16 embazanê xo reyde ameya tepiştiş. No zî mojneno ra ke çiqas hêrişêk xidar serê çapemenîye esto. Tirkîya de nîno waştiş ke çapemenî laver şêro û tim bi birnayîşê vengê înan hewil danê ke çapemenî nêeşko xo biresno komelî. No zî dano dîyar kerdiş ke îqtîdar nêwazeno şar rastî bivîno. Nêwazeno polîtîkayê ke rayra beno bêro vînayîş. Coka hêrişê xo zî dewam keno. La her tim seke ma vato, bi her hawa zî ma do rastî biresnê şarî. Ma vizêr zî kerd, ewro zî dewamê karê xo ma do bikerê."

	 

	‘Ganî paştdayîşê seba çapemenî tewr zêde bibo'

	 

	Remzîye, peynîya qiseykerdişê xo de dîyar kerd ke ganî paştdayîşê seba çapemenîya azad zêdeyêr bibo û vat: "Roja ke ma ameyî destbendkerdiş heta ewro ma taqîb kerdêne, paştdayîşêk pîl serê ma de virazîyabi.  Xeylêk sazgeh û rêxistinê cîya zî paştdayîşê ma kerdî. Ma xeylêk sîpasîya înan kenê. Paştdayîş seba çapemenî xeylêk muhîm a. Eke çapemenîya azad nêra pawitiş, çi heyf sernêkeweno. Paştdayîş ganî timî bibo û pîlêr bibo. Hema zî embazê mayê tepişteyî estê. Ganî seba înan zî paştdayîşêk pîl bêro dayîş û ê embazê ma demêk nêzdî de biresê azadîya xo."

	 

	‘Rojnamegerî gerdûnî yê’

	 

	Rojnamegere Elîf Ungur, dîyar kerd ke pêwa pêro hêrişan çapemenîya azade têkoşînê xo pîlêr kena û vat: "Hêrişê hemverê çapemenîye reya ewil nîyo û peynî nîyo. Hêrişê hemverê rojnamegeran bi eynî rengî yo. Xeylêk embazê ma yê ke bi serran o nê ware de kede danê, bi eynî sûcan ameyî muhakemekerdiş. Pêwa pêro zext û zordestîyan çapemenî timî têkoşînê xo pîlêr kerda. No hêriş esasê xo de serê çapemenîya kurdî bî. Goreyê nêzdîya înan ganî çapemenî yewperest bibo. La hetê ma rojnamegerî ganî xîtabê pêro kes, nijad û netewan bikero. Seba ke rojnamegerî gerdûnî ya. Coka ma wazenê pêro şaran rê na rastîye neql bikerê. Hema zî embazê ma yê  rojnamegerî zîndan de yê û bi serran o bi nê hêrişan reyde rî bi rî yê. Qerarê tehliyekerdişê ma lûtuf nîyo. Xora no heqê ma yê normal o. Serrêke zêdeyêr wextê ma diznayî. No hêriş zî tay girêdayeyê weçînayîşî bi. Seba ke waştêne vengê kesêk tenê bêro eşnawitiş. Xeberê ke waştêne tenê hetê înan ra bêro weşanayîş û propagandayê xo bikerê. Sewbîna hemverê kurdan zî antî propaganda bikerê. Fikiryayî ke bi zext kerdişê çapemenî biresê amancê xo. La raşteyê çapemenîye de tu wext na qeleme nêkewena erd, vera her embazêke do embazêke bîn cayê xo bigîro. Yanî do çapemenîya azade tu wext nêra bêvengkerdiş."

	 

	‘Rojnamegerîye berpirsyarî ya’

	 

	Elîfe, tewr peyîn wina vat: "Paştdayîşê kedkarê çapemenîye xeylêk ma kêfweş kerd. Nê prosesî de mi zêdeyêr berpirsyarîya xo ferq kerd. Kedkarê çapemenîye tenê şexsê xo nê, eynî wextî de şarê xo zî temsîl kena. Gama ke ma zîndan ra vejîyayî, cinîyêke ame verê mi û vat, dimayê şima mi waşt ez bibî rojnamegere. Vatişê a cinî mi xeylêk hîsgêr kerd. Gama ke merdimêke bi vindertiş û helwestê xo şarî rê beno nimûne, no merdimî hîna kêfweş keno. Yanî 13 aşmê ma veng derbaz nêbî kedêke ma estbî."