Qeyûm şarî bê awe verdeno! 2023-07-11 11:29:18     AMED - Amed ke germîya hewayî ke vejîyeno 40 dereceyî ser, tesîrêk negatîf cuya merdimê ke keyeyê ‘Sosyal Konut’î de manenê keno. Şaredarîya ke binê rayîrberîya qeyûman de ya seba çareserkerdişê problemî çîyêk nêkena.    Qezaya Peyasî (Kayapinar) ya Amedî de kêmanîya awe ke her serrê hamnanî de ciwîyenê, emserr zî dewam keno. Kêmbîyayîşê awe bajaro ke germîya hewayî reseno 40 dereceyî de tesîrêk xirab cuya hemwelatijan ser de keno. Hemwelatijî reaksîyon mojnayî şaredarîya ke binê rayîrberîya qeyûmî de ya û probleman çareser nêkena.    'Kêmbîyayîşê awe tesrîê cinîyan keno’    Felek Îşcane derheqê birîyayîşê awe de zî dîyar kerd ke no hewteyêk o bi birnayîşê awe reyde rî bi rî manenê û ard ziwan ke par zî eynî problem estbî û hemwelatijî na rewşe protesto kerdî. Feleke wina vat: “Par zî ma birnayîşê awe raşte de protesto kerdbî. Ma aşmanê hamnanî de yê. Ma germ benê, kincê ma, firaqê ma lêşin benê, la ma nêeşkenê bişuyê. Kêmbîyayîşê awe bi taybetî serê ma cinîyan de tesîrê keno. Ma hîna zêde mexdur ê.”    'Bi rojan o awe çin a’    Feleke dîyar kerd ke bi rojan o awe ameya birnayîş û şaredarîya ke binê rayîrberîya qeyûmî de ya paroblem çareser nêkena. Feleke ard ziwan ke wexto ke qeyûm awe verdeno zî xeylê kêm herikîyeno û nê çîyan vat: “Seba ke awa ke herikîyena şidnaye nîya, ma nêeşkenê kombîyanê xo û makîneyanê xo yê bînan bişuxulnê. Awe cuye de zaf muhîm a. Germîya hewayî de ma bi rojan nêeşkenê sereyê xo bişuyê. Birîyayîşê awe vera ma nêeşkenê çîyêk bikerê û ma zaf aciz ê. Mi şaredarîye rê telefon kerd la cewab nêda.”    Feleke tewr peynî nê çîyan vat û qiseykerdişê xo qedêna: “Ganî şaredarî goreyê waştişê şarî têbigêra û problemê awe çareser bikera.”