
Pêwa zextan bî westaya asinî 

2023-07-08 10:00:33


	&nbsp;

	&nbsp;

	Nazlican Yildiz

	&nbsp;

	ÎZMÎR - Gulcan Felekogluya ke 17 serrî yo asinkarî kena vera heme vatişanê ‘tîya aîdê camêrdan o’ têkoşîn rayra berd û karê xo açarna hunerî.&nbsp;

	&nbsp;

	Gulcan Felekogluye qezaya Xinûsi ya Erziromi de ameya dinya û westayê asinî ya. Gulcane 47 serrî ya û bado ke zewecîyaya bi mêrdeyê xo reyde dest bi asinkarîye kena. Vera heme vatişan karê xo açarnaya hunerî. Gulcane dîyar kerd ke ganî cinî her ca de biba û ganî cinî heqê xo tu kesêk rê nêverda û têkoşîn bikera.&nbsp;

	&nbsp;

	Gulcane qiseykerdişê xo de dîyar kerd ke hem asinkarîye kena hem zî hunerî reyde meşgul bena û wina vat: “Çîyo esas no yo ke ez cinî ya. Ez Tirkîya de ciwîyena. Xeylê cinî Tirkîya de îşkence vînenê û bîyayîşê cinîyan zî yeno cipersayîş. Wexto ke mi newe dest bi nê karî kerd mi rê vatêne ‘ti nêeşkena bikera’, ‘no karê to nîyo’. La goreyê mi cinî wayîrê hêzêk gird a. Xora mi qerarê xo dabî.”&nbsp;

	&nbsp;

	Seba herêma erdlerzî dîyarîya Sîmurgî &nbsp;

	&nbsp;

	Gulcane vat ke aye evîndara asinî ya û asin adirî ser de germ beno û qala xebata xo ya bi nameyê Sîmurgî kerd: “Xebata ma ya peykerî esta. Sîmurg seba mi zaf watedar o. Newera bîyayîşî dano. Erdlerzo ke demê nizdîye de Tirkîya de pê ame de ma hewl da Sîmurgî ke newe ra bîyayayîşî îfade keno, dîyarîya Antakya bikerî. Hewldayîşê ma dewam keno. Amacê newerabîyayîşê Sîmurgî no bî ke dîyarîya Antakyaye bêro kerdiş.”&nbsp;

	&nbsp;

	‘Projeyê mi estê’ &nbsp;

	&nbsp;

	Gulcane da zanayîş ke heta cinî xo bîyaye nêkera û xo newera awan nêkera do mahkumê mergî biba û wina dewam kerd: “Her adir hewceyê rehmî yo. Her wextê newera bîyayîşê yê Sîmurgî yo. Ez hema destpêk de ya. Ganî ma cinîyî her raşte û sektorî de bibê. Ez sey cinîyêk tîya de ya. Ameyoxê verênan de projeyêk ma esto. Projeyê ma yê viraştişê Abîdeya Gazî ya Keyeyê Cemî ya taxa Gazî esta. Ma mînyaturêk dî. Xebatêke ke qala cinîyanê koçgirîyî kena zî esta. Embazê ma mînyaturî zaf ecibnayî. Hêvîya mi no yo ke netîceyêk baş bêro girewtiş. Ez wazena bi destê cinîyêke no bêro kerdiş.”&nbsp;

	&nbsp;

	‘Ganî ma têkoşîn bikerê’ &nbsp;

	&nbsp;

	Gulcane dîyar kerd ke ganî têkoşîn bêro dayîş û wina peynî ard: “Eke mi xo bidayêne hetêk ez ewro nêbayêne westayê asinkarî. Mi belgeyê westatîya asinkarîye girewt. Ganî ma cinîyî têkoşîn bikerê. Çîyo ke merdimî azad bikero cinî ya. Tu kesêk heqê merdiman nêdano. Ganî ma bi xo heqê xo bigîrê. Ma do bi têkoşînî heqê xo bigîrê. Ez na dinya de çend xurt vindera do vengê mi zî hende xurt bivejîyo.”&nbsp;

	&nbsp;