Afganîstan de kuaforê cinîyan yenê padayîş 

2023-07-03 15:19:27


	 

	 

	MERKEZÊ XEBERAN - Talîbanî na rey zî ferman da ke ruhsatê pêro salonanê kuaforan ê cinîyan bêrê betalkerdiş.

	 

	Talîbano ke serra 2021î de îdarekarîyê Afganistanî desteser kerd, heqê cinîyan pêrûne desteser kerd. Wezaretê Refah û Qedexekerdişî yê Talîbanî, serê medyaya Afganistanî de eşkerayîyêke weşana û da dîyarkerdiş ke do pêro ruhsatê salonanê kuaforan ê cinîyan bêrê betalkerdiş.

	 

	Ame dîyarkerdiş ke do heta 5ê tebaxe seba padayîşê salonanê kuaforan ê cinîyan wext ameyo dayîş û dimayê nê tarîxî pêro peymanê salonanê kuaforan ê cinîyan do bêro betalkerdiş.

	 

	Dimayê ke Talîbanî nêzdîyê di serrî verê Afganîstan kerd binê kontrolê xo, serê cinîyan de qedexeyê cîya ameyî caardiş. Talîbanî seba ke mekteb û unîversîte hemverê cinîyan de pada, îstîhdamê cinîyan ê pêro sazgehê dewlete û yê sivîlî de zî peynî kerd. Xeylê cinîyê ke seba bêkar ê, muracatê kuafor û terzîtî kenê û do bi nê fermanî reyde reyna bêkar bimanê.