‘Wa kiştoxê tutanê mi bêrê cezakerdiş’ 

2023-07-02 14:55:50


	 

	 

	RIHA - Emîne Şenyaşar çalakîya Nobeta Edaletî de wina vat: “Wazena kesê ke tutanê mi qetil kerdê, bêrê cezakerdiş. Heta edalet pê yeno zî ez o fek nobeta xo ra vera nêdana.” 

	 

	14ê hezîrana serra 2018ine de merdim û pawitoxê Parlamenterê AKPyî yê Rihayî yê verê Îbrahîm Halîl Yildiz qezaya Pirsûsî ya Rihayî de hêrişê keyeyê Şenyaşarî kerd. Hêriş de mêrde û di lajê Emîne Şenyaşar ameyî qetilkerdiş. Emîne Şenyaşar û lajê aye Parlamenterê Partîya Çep a Keske yê Rihayî Ferît Şenyaşar ke qirkerdiş ra bi birîndar xelas bîbî, 9ê adara 2021ine de vernîya Edlîyeyê Rihayî dest bi Nobeta Edaletî kerdibî. Çalakîya keyeyî roja 832ine de dewam kerd. Emîne Şenyaşare seba nêweşîyê xo nêeşka bêra vernîya Edlîyeyê Rihayî coka nobete keyeyê xo yê Pirsûsî de dewam kerd. Dayîka Emîne vernîya keyeyê xo de bi pankartê “Edaletî” nobete dewam kerd. 

	 

	Emîne Şenyaşare, vat ke ê wazenê edalet pê bêro û nê çî vat: “Hewl danê edalet bêro dest kerdo. Seba roniştişê lajê mi demêk kilm mend. Wazena kesê ke tutê mi qetil kerdê, bêrê cezakerdiş. Heta ke edalet pê nêro, ez o fek nobeta xo ra vera nêdî.”

	 

	Keyeyî, seba wesîleya 30ine serrgêra qirkerdişê Madimakî serê hesabê xo yê medyaya dijîtale de mesajêk pare kerd û wina vat: “Ewro 2yê Temmuze, serrgêra Qirkerdişê Sêwasî yo. Sewbîna roja 832ine ê têkoşînê ma yê edaletî yo. Sêwas de merdimî ameyî veşnayîş û kiştiş. Gelo kam ci kitabî de qalê şewitê merdiman yeno kerdiş? Qetilkerdişê birîndarî nêweşxaneyî kam ci kitabî de esto? Sûcdarî eşkere yê la edalet ça de yo?”