Seba kerdoxî bêrê cezakerdiş do bişuxulîyê

2023-07-02 10:34:06


	 

	 

	COLEMÊRG - Merkezê Heqê Cinîyan ê Baroyê Colemêrgî avûkate Meryem Atmaca, dîyar kerd ke ganî derheqê merdişê bişik ê cinîyan dr cigêrayîşêk  baş bêro kerdiş û qetî kiştoxî bêrê cezakerdiş. 

	 

	Kurdistan û Tirkîya de her roja ke derbaz bena kiştiş,  şîdet û îqtîdarê hemverê cinîyan zêde beno. Xeylêk cinî zî bi şikdarî dinyaya xo bedelnenê. Bajaro ke tewr  zêde merdişê bişik estê Colemêrg o. Merkezê Heqê Cinîyan ê Baroyê Colemêrgî Avûkate Meryem Atmaca derheqê merdişê bişik de ajansê ma rê qisey kerd.

	 

	Meryeme, dîyar kerd ke şîdetê hemverê cinîyan û merdişê bişikî seke bajarê bînî Colemêrg de zî pê yeno û vat: "Tedayo ke bi rayîrê dewlete hemverê cinîyan de yeno kerdiş, her roja ke şino zêdeyêr beno. Bi xususî zî şîdetê; psîkolojî, fîzîkî û cinsî bi destê dewlete pê yeno. Dima ra sey qeza yeno mojnayîş. Bi xususî polîtîkayê ke Tirkîya de yenê rayraberdiş, rayîr ver bi kiştişê cinîyan akeno. Polîtîkayê bêcezaverdayîşî zî cesaret dano camêrdan." 

	 

	Meryeme, da zanayîş ke cipersayîşê ke derheqê şîdetê psîkolojî û fîzîkî yenê destpêkerdiş, bi lêz û bez yenê nimitiş û wina vat: "Cipersayîşî yenê destpêkerdiş la seba mekanîzmayêk kontrolî çin o bi lêz û bez cipersayîşî yenê peynîkerdiş. Ganî delîlî bêrê arêdayîş la nêkenê. Merkezê Heqê Cinîyan ê baroyî ame awankerdiş û nê prosesî de do hewl bidê ke merdişê cinîyan ê bişik taqîb bikerê.”

	 

	Meryeme, dîyar kerd ke sey merkez merdişê bişik de vînenê ke tîya qetilkerdişêk esto û wina vat: "Nimûneyê Şûle Çete mîyanê rayaumûmî de veng da û sey întîxar ame mojnayîş. La bi hewldayîşê keye  û rayaumûmî vejîya werte ke Şûle ameya kiştiş. No çî mojneno ke qetilkerdişê cinîyan sey întîxar yeno mojnayîş. Ma hewl danê Colemêrg de zî serê merdişê nê rengî de vinderê. Ma do hewl bidê cinî muracatê nê merkezî bikerê û ma do xo mîyanê komelî de bidê nasnayîş.”

	 

	Meryeme qiseykerdişê xo de wina bale ant serê xebatanê merkezî: "Ma do Colemêrg û merkezê ci bi sazgehê sivîlî yê komelî reyde perwerdeyan organîze bikerê û hewl bidê ke cinîyan hêzdar bikerê. Ma baş zanê ke wexto ke cinî pîya bê bi hêz ê. Ma do sey merkez tedayê mekanîzmayê hukmî bikerê ke merdişê bişik ê cinîyan baş bêro cigêrayîş, kiştox û kerdoxî bêrê cezakerdiş. Ma reyke vanê ma do kîşte cinîyan de bê û cinî eşkenê bi rihetî bêrê muracatê ma bikerê.”

	 

	Çelê Z.T., Colemêrg de Muhbet C., Tulay Yaşar, M.A û tewr peyîn Asmîn K.Y.a 23 serrî ke bi çawişê pisporî reyde zewicîya, bi hawayêkê bişik dinyaya xo bedelnayî. Colemêrg û qezayê ci, dosyayê merdişê bişikî yê cinîyan bi pêkerdişê eşîran reyde ameyî padayîş.