Ayşe Gokkan gerreyê sercergê Ahrar Şarkîye kerd 

2023-06-15 15:48:32


	 

	 

	ANQARA - Vervatoxa TJA Ayşe Gokkan gerreyê sercergê Ahrar Şarkîye Ebû Hatim Şakrayî kerd ke kiştoxanê Hevrîne Xelef ra yew o.

	 

	Vervatoxa Têgêrayîşê Cinîyan ê Azadan (TJA) Ayşe Gokkana ke Zîndanê Sîncanî de tepişîyena, bi waştişnameyêkî gerreyê fermandarê Ahrar Şarkîye Ebû Hatim Şakrayî kerd. 

	 

	Pêro wezîfedarê dewlete gerre kerd

	 

	Ayşe muracatê ke seba gerre kerd de dîyar kerd ke Ebû Hatim Şakra sere de sîyasetmedara kurde Hevrîn Xelef, berpirsyarê xeylêk qirkerdişan o. Ayşeye bale ant ke sercergê Ehrar Şarkiye Ebu Hatim Şakra ke sûcê hemverê merdimayî kerdo û bi sûcê şerî yeno sûcdarkerdiş Unîversîteya Artukluyî ya Tirkîya de mezûn bîyo. Ayşe gerreyê xo de wina vat: 

	“Unîversîteya Artukluyî derheqê nê serkêşê rêxistine de wayîrê tesîr û îqtîdarê îdarekarî yo. Seba xebatê xo yê Tirkîya dewam bikero ez hemverê Hakan Fîdano ke heta nê demê peyîn serekê Teşkîlatê Îstîxbaratê Neteweyî bî, selahîyetdarê bînî yê MÎTî û heme wezîfedarê îstîmlakî yê ke nê sûcdaran pawenê de, gerre kena.”

	 

	Ayşe dîyar kerd ke na rêxistine û terefgirê ci bi komqirkerdiş û qetlîamê bi taybetî hemverê sîyasetê cinîyê kurdî de yeno rayraberdiş, polîtîkayê şerî çarçewaya sûcê giran de yenê nasnayîş û wezîfeyê dozgerî ke hemverê nê sûc û sûcdaran bikewê tevger.