Vera pelçiqnayîşê komelî de teşwîqê hunerî kenê 

2023-06-10 11:21:40


	 

	 

	Melîke Aydin

	 

	ÎZMÎR – Cinîyê Îzmîrî koma resimî awan kerd, pêşangehê resimî akerdî. Meryem Gulbudaka ke pêşangeh de berardişanê aye zî ca gênê, dîyar kerd ke Tirkîya de huner binê tedaye de yo û beno sebebê pelçiqnayîşê komelî û vat ke vera nê de ganî hîna zêde teşwîqê hunerî bêro kerdiş.

	 

	Îzmîr de bi serkêşîya cinîyan di serrî verê cû koma resimî ameye awankerdiş. Endamê kome xebata di serran bi pêşangehêk vetî vernîya hezkerdoxê fotografan. Pêşangeh Merkezê Dayîş û Herînayîşî yê Parkê Bornovayî de mabenê 3-7ê Hezîrane de pê ame. Tabloyê Hacer Varlik, Sacîde Yurdakul, Nadîre Ekmen, Merhem Gulbudak, Cemîle Gençal, Zubeyde Sezen, Nagehan Çakir, Alî Riza Taş û Alî Yorukî ca girewtî.

	 

	Resama amatore  Meryem Gulbudaka ke tabloyê aye zî pêşangeh de ca gênê dîyar kerd ke huner merdiman keno merdim, dinya de hîs û fikrî dewlemend keno û raşteyêk winasî yo. Meryeme wina vat: “Merdim bi hunerî reyde çend eleqedar bibo do rih, ziwan û hîssê merdimi hende weş bibo. Ganî her kes bi hunerî reyde eleqedar bibo. Yê ke bi hunerî reyde eleqedar nêbenê, xoza, cuye û komelî baş nas nêkenê. Huner raşteyêk xeylê dewlemend o. Ganî her kes bi çîyêk reyde eleqedar bibo. Eke perwerde bêro girewtiş do hîna baş bibo.”

	 

	

	Hunerî teşwîq kena

	 

	Meryeme ard ziwan ke AVM zî bibo ê hunerî benê raşteyê îstîmlakî û teşwîqê hunerî kenê. meryeme qiseykerdişê xo wina dewam kerd: “Çîyo ke ez vînene, tutî xeylê eleqedar ê. Dadî û babîyê xo bi zorî anê. No zaf çîyok muhîm o. Tirkîya de huner binê zextan de yo. Konser, şahîyê şar, festîval û şewê hunerî her ke şino kêm beno. Bi şewe saet 00.00î ra dima muzîk yeno qedexekerdiş. No zext o. no kêmasî yo. Konser yenê astengkerdiş. Hunermendî bi nê astengîyan cuya xo dewam kenê. Do senî îdareyê xo bikerê.”

	 

	Huner bêro astengkerdiş do komel bigecilîyo

	 

	Meryeme qiseykerdişê xo yê peyênan de vat: “Ez mamosteya teqawît a. 50 serrî yo verê cu mekteban de hîna zêde dersê muzîk, resim û hunerî ameyêne dayîş. O wext tewr tay hirê saet ders ameyêne dayîş. O wext eleqeyê mi resimî rê est bî. Huner zaf muhîm o. Huner bêro astengkerdiş do komel bigecilîyo. Her roje şîdet bi cinîyan yeno kerdiş. Cinî yenê qetilkerdiş. Ma komelêk winasî de ciwîyenê. Eke huner hîna zêde biameyêne dayîş do komel wina nêbayêne. Huner çinî bibo, komel aver nêşino, aştî pê nîna. Coka ra nê polîtîkayê hunerî şert ê. Kilîtê çareserîye zî azadî ya. Ganî qedexe bêro wedaritiş.”