Seba eştişê rayan veng: Ma bi Erdoganî da vînîkerdiş 

2023-05-25 10:10:15


	 

	 

	Dîlan Babat

	 

	ANQARA - Hemsereka HDPyî ya Anqaraye Pakîze Sînemîlîogluye derheqê turê diyînî yê weçînayîşê serekkomarîye ke do roja yewşeêe pê bêro de qisey kerd û vat: “M abi Erdoganî da vînîkerdiş. Ma do 28ê Gulane de zî newe ra bi Erdogan û dîktatorîya ci bidî vînîkerdiş.”

	 

	Weçînayîşê serekomarî ke 14ê Gulane de turê diyînî rê mend û weçînitox do 28ê Gulane de reyna şêrî sindoqan ser. Weçînitoxî  do weçînayîşê 28ê Gulane de mabenê namzede Tîfaqê Mîllet Kemal Kiliçdaroglu û namzede Tîfaqê Cumhurî Tayyîp Erdoganî de tercîhê xo bikerê.  

	 

	Weçînayîşî rê çend roje mend û partîyê sîyasî xebata xo bi lez domnenê. Hemsereka Partîya Demokratîke ya Şaran (HDP) ya Anqaraye Pakîze Sînemmîlîogluye vera zîhnîyetê camêrd yê meclîsî de venga şîyayîşê serê sindoqan kerd û eştişê rayan kerd.

	 

	

	‘Peynîya dîktatorîye ame’

	 

	Pakîzeye da zanayîş ke serekkomarê AKPyî Tayyîp Erdogan turê yewine de vînî kerdo û se ra 49î de mendiş zî manîpulasyon o û wina vat: “Ma bi Erdoganî da vinîkerdiş. Ganî na rewşe şarî rê biba hêvîyêk gird. Ma eşkenê 28ê Gulane de newera bi Erdogan û dîktatorîya ci bidî vînîkerdiş. Ma her tim xover da û ma do no dîktatoro faşîst bierşawê. Wa şarê ma bêhêvî nêmano. No dîktatorî ameyo peynî.”

	 

	‘Ma do turê diyînî de temam bikerê’ 

	 

	Pakîzeye dîyar kerd ke vînîkerdişê AKP-MHPyî de tesîrê partîya înan zaf zêde yo û wina dewam kerd: “Wa şarê ma qet bêhêvî nêmano. Ma bi hêvîya xo 28ê Gulane de şêrî sindoqan ser. Ma do karê xo yê nîmcetî temam bikerê. Sewbîna yew çare çin a. Meclîs de zafaneyê zîhnîyetê camêrdî yo. Huda Par zî meclîs de yo. Coka ra ganî no îqtîdar şêro. Seba destkewtişê cinîyan nêrê çinîkerdiş ganî no îqtîdar şêro.”

	 

	‘Ma do vera faşîzmî de vengê xo berz bikerê’

	 

	Pakîzeye qiseykerdişê xo yê peyênan de ard ziwan ke Partîya Çep a Keske 29 parlementerê cinîyî erşawit meclîs û wina qiseykerdişê xo qedênaye: “No îmkanêk o û do cinî meclîs de vatişê xo bivajê. Ma do vengê xo bi dinya bidê eşnawitiş. Ganî Huda Par, AKP û MHP meclîs de çinîbibayêne. La estê. Ma do zî vera înan de têkoşînê xo bikerê. Ma do vera faşîzmî de vengê xo berz bikerê. Ez venga heme şarî kena ke 28ê Gulane de şêrê sindoqan ser û dîktatorî tarumar bikerê, rayîrê demokrasîye akerê. Ma cinîyî bêhêvî nîyê. Ma do newera ser bikewê.”