Dayîka Aştîye: Ez têkoşînê xo ra fek vera nêdana! 

2023-05-10 11:40:43


	 

	 

	Marta Somek

	 

	STENBOL - Xeylê cinîyî, bi serkêşîya TJAye 16ê Teşrîna Peyêne ya 2022î de çarçeweya 25ê Teşrîna Peyêne de Raşteyê Kartalî ra rayra şîyî Raşteyê Rihtimî. Rayraşîyayîşî de bi bahaneyê Dayîka Aştîye Bedîa Gokguze fotografê Sakîne Cansize akerda derheqê aye de dewa ameye akerdiş. Bedîaye da zanayîş ke polîtîkaya gecilnayîşî ya û heta peynîya cuya xo do têkoşînê xo dewam bikera.

	 

	Bi bahaneyê rayraşîyayîşo ke çarçeweya 25ê Teşrîna Peyêne Roja Têkoşînî yê Vera Şîdetê Serê Cinîyan de ameyo viraştiş de Dayîka Aştîye Bedîa Gokguze fotografê Sakîne Cansize akerda û dîmenê xebere ya ke ajansê ma weşanayo de dewa ameye akerdiş. Serdozgerîya Komare ya Stenbolî 13yê Adare de bi îdîaya ‘propagandaya rêxistine kerda’ îdîaname amade kerd.

	 

	Roniştişê yewine 30ê Gulane de yo

	 

	Yewine roniştişê dewaya ke dayîka Aştîye Bedîaye ke bi serran têkoşînê xo bi qerardarî rayra bena de ameye akerdiş do 30ê Gulane de saet 10.50î de Mehkemaya Cezaya Girane ya 28ine ya Edlîyeya Stenbolî ya Çaglayanî de bêro dîyîş.

	 

	

	 

	Vîdeoyê ke ajansê ma de ameyî weşanayîş zî suc ameyî hesibnayîş

	 

	Bedîaye derheqê babete de ercnayîşî kerd û vat ke aye 24ê Teşrîna Peyêne de seba nimajî şîya camî û wexto ke vejîyaya vengê sloganê ‘jin jiyan azadî’ eşnawita û vat: “O wext Îran de Jîna Emînîye ameybî qetilkerdiş. Ez ver bi îna ra şîya. Fotografêk dayî mi. Mi nêzanayêne fotografê cinîya ke ameye qetilkerdiş bî. Seba ke mi fotografî berz kerd derheqê mi de dewa ameye akerdiş. Dima ra vengê îfadeyî dayî. Fotografêk mojnayî mi. Vatî ke no fotograf ajansê JINNEWSî de ameyo weşanayîş û fotografê cinîya ‘terorîst’ o. Mi zî vat fotografê cinîyê ke ameyî qetilkerdiş o. La polîsî waştî ke ajans û çalakîyan krîmînalîze bikero. Persê ‘ti kam a’ persayî. Mi zî vat ‘Ez dayîka aştîye ya’.”

	 

	Têkoşînî de qerardar a: Ez fek ci ra nêverdena

	 

	Bedîaye peynîya qiseykerdişê xo de eşkera kerd ke her çî seba aştîye kena û vat: “Seba ke ma aştîye wazenê ma yenê destbendkerdiş, dewa ma rê yenê akerdiş. Roniştişê yewine yê dewaya mi 30ê Gulane de yo. Mi ra persê ‘tutê to koye de estê’ persayî. Mi zî vat ‘ti zanê ez dayîka aştîye ya, ti qey nê persan mi ra persenî’. Nê heme polîtîkayê gecilnayîşî yî. La ez qet fek têkoşînê xo ra nêverdena. Waştişê dayîşanê aştîye tena aştîye ya. Heta peynîya cuya xo ma do têkoşîn bikerê. Ma israrê xo yê aştîye de qerardar ê. Heta aştî nêra ma do têkoşîn bikerê. No weçînayîş têkoşînê bîyayîş û çinîbîyayîşî yo. Çi destê ma ra bêro ganî ma bikerê. Ma têkoşînê xo gird bikerê.”