Cinîyê Silopyî: Cinî do bi rayanê xo aştî û têduştî bîyarê 

2023-05-03 10:33:46


	 

	Sema Çaglak

	 

	ŞIRNEX - Cinîyê Silopyî derheqê rojeva weçînayîşî de qisey kerdî û dîyar kerdî ke cinîyî do bi rayanê xo aştî û têduştî bîyarê nê welatî.

	 

	Partîya Çep a Keske ku xebatê xo yê seba weçînayîşî yê 14ê Gulane bêmabên dewam kenê. Çarçewaya xebatanê xo de twir bi tewir bername û mîtîngan organîze kenê. Xebatê partî hetê şarî ra bi coşêk pîl yenê pêşwazîkerdiş. Cinîyê Silopyî zî derheqê weçînayîşî de qisey kerdî.

	 

	Gulbahar Aslane, dîyar kerd aye weçînayîş de seba heqê azadîya ziwanê xo do raye bişuxulna û vat: “Ziwanê me kurdkî yo, ma kurd ê û nasname û bîyayîşê xo zanê. Seba nê ma raya xo danê Partîya Çep a Keske. Partîya Çep a Keske têduştî wazena û heqê pêro şaran pawena. Meclîs de zî do cinî vengê xo berz bikerê û vengê xo biresnê her ca. Gama ke ma vanê, 'Jin Jiyan Azadî' no seba ma tena sloganêk nîyo. No seba ma felsefeyêk o. Demo cinî destê xo bidê yewbînan do serbikewê. La îqtîdar hêzê cinî ra terseno. Cinî wazena her wareyê komelî de rengê xo bimojna.”

	 

	‘Ma do raya xo bidê xo’

	 

	Fatma Tabak zî dîyar kerd ke ganî kurdî mîyanê xo de bibê tîfaq û wina vat: “Erdogan na rey do vînî bikero, ma do serbikewê. Wa nê kesê xayînî mîyanê kurdan ra vejîyê û kurdî tîfaqê xo viraznê. Ganî berê zîndanan abikerê. Na serre serra serkewtiş û aştîye ya. Gama ma serkewtî do seba şarê ma demokrasî bêro. Ganî ma raya xo bidê xo, yanî raya xo bidê  Partiya Çep a Keske.”

	 

	‘Cinî do rayanê xo aştî û têduştî bîyarê’

	 

	Eylem Dadak zî ard ziwan ke her ke şino hêzê xo tewr zêde mojnenê û vat: “Ma cinî ma do bi rayanê xo aştî û têduştî bîyarê. Ma êdî zilm û zordestî û qirkerdişê cinî qebûl nêkenê. Ma estê û ma do bibê. Ma rayanê xo hîna berz bikerê. Ma bi hêvîya serkewtişî ver bi weçînayîşî şinê. Demo ke ma cinîyî pîya bê û vengê xo bikerê yew ma do serbikewê.”

	 

	Emîne Yaliç zî vat: “Şarê kurdî her cayê dinya de aştî û azadî wazeno. Ma azadîya serekê xo û tepişteyanê xo wazenê. Ma wazenê serê herra xo cuyêka azad biciwîyê.”  

	 

	‘Cinîyî nêtersenê’

	 

	Tewr peyîn zî Nuriye Uca qisey kerd û dîyar kerd ke cinî êdî nêtersenê û vat: “Cinî û dayîkî do serkewtiş bîyarê. Ma êdî nêtersenê û do têkoşînê xo dewam bikerê. Wa tepişteyê ma zî serbest bêrê veradayîş û rayîrê aştî abibo.”