Rojnameger Dîcle û Sedat Yilmaz ameyî tepiştiş 

2023-05-03 10:07:44


	 

	 

	ANQARA -  Rojnamegere Dîcle Muftuoglû û Sedat Yilmaz ameyî tepiştiş. 

	 

	Çarçewaya Serdozgerîya Komare ya Anqarayî de 15 bajaran de operasyon amebî destpêkerdiş. Sereştişê keyeyan de 19 kesî amebî destbendkerdiş. Hemsereka Komeleya Rojnamegeranê Dîcle Firatî (DFG) û edîtora Ajansê Mezopotamyayî (MA) Dîcle Muftuoglû û edîtorê MAyî Sedat Yilmaz zî mîyanê destbendkerdeyan de bî. Fîlîz Yilmaz dimayê îfadeyê dozgerî ameye veradayîş. 15 kesî bi waştişê tepiştişî û 3 kesî zî bi şertê kontrolê edlî sewqê Dadgerîya Cezaya Sulhî ya Nobedarî ameyî kerdiş.

	 

	Dadgerî derheqê rojnamegere Dîcle Muftuoglû û Sedat Yilmaz, Erol Balci, Abdurrahîm Tanyerî û Ramazan Debe de qerarê tepiştişî da. 

	 

	Cinîya Sedat Yilmazî, Selma Yilmaz, Cahît Kanbay,  Cîhan Guneş, Îsamîl Adanmiş, Cahît Ablay, Mahmut Dogû, Devran Ak, Şemsettîn Toprak, Mehmet Emîn Yildirim, Cevdet Îsmaîlogûllari, Hasan Ozhan, Evîn Ozbek û Sûat Karagoz bi şertê kontrolê edlî yê îmza û qedexeyê tebervejîyayîşê teberê welatî ameyî veradayîş.

	 

	Rojnameger Sedat Yilmaz korîdorê edliyeyî de reaksîyon vera qerarî mojna û wina vat: “Sîstemo rayîrbirnaye do 10 rojî dima biqedîyo, ver bi rijnayîşî yo.”