Partîya Çep a Keske bi namzedanê ciwanan hêvî dana  

2023-04-29 10:24:45


	 

	 

	ERDEXAN - Namzeda ciwan ya Partîya Çep a Keske Dîcle Akturke dîyar kerd ke cinî seba ameyoxî bi hêvî yê û ganî cinî bêveng nêmana.

	 

	Weçînayîşê serrekomarî û parlementerî yê prosesê 28ine ke do 14ê Gulane de pê bêro rê demêk kilm mend. Seba ke derheqê Partîya Demokratîke ya Şaran (HDP) de dewaya qefilnayîşî ameybî akerdiş HDP bi nameyê Partîya Çep a Keske do dekewa weçînayîş û partîya ke tewr zêde cinîyan namzed mojnaya aye ya.

	 

	Goreyê dayeyan 750 cinî seba namzedî muracatê Partîya Çep a Keske dayî. Partîye esasê temsîlkarîya seyeywbînanîye de 270 cinîyan lîsteya xo de namzed mojna. 35 bajaran de cinî rêzê yewine de ca gênê û hedefe înan no yo ke tewr kêm 55 cinî dekewê parlemento.

	 

	Namzedê cinîye yê Partîya Çep a Keske ya Erdexanî ra yew zî Dîcle Akturke ya û rêza diyîne de ameya mojnayîş.

	 

	Xeylê kesî betalîye vera koç kenê

	 

	Dîcleye 19 serrî ya, wendekara sinifê yewine yê beşe Komelnasî ya. Sey xeylê ciwananê Erdexanî aye zî Stenbol de ameya dinya. Erdexan ke hetê berardiş û weyekerdişê heywanan ra dewlemend a, ekonomîye vera merdim herême ra koç kenê. Keyeyê Dîcleye zî nê sebebî vera koçê Stenbolî keno û 30 serrî yo ke Stenbol de cuyenî.

	 

	Dîcleye dîyar kena ke keyeyê aye bi hawayêko aktîf têkoşînî de ca girewto û wina dewam kerd: “Ez Partîya Çep a Keske de ca gêna. Tabî tesîrê keyeyê mi zaf mi ser de bî. Mi zî waşt ke ez wina dewam bikera.”

	 

	‘Partîya cinîyan a’

	 

	Dîcleye sewbîna seba babeta ke beyannatê weçînayîşî yê cinîyan de ca gêna zî wina vat: “Na nuqta vera binpaykerdişê keda cinîye de ameya kerdiş. Tabî nuqtayê xeylê muhîm û raşt ê. Na hete de mojnena ke Partîya Çep a Keske partîya cinîyan a. Hetê ma ra zî çîyêko zaf weş o. Erdexan de cinî zêde nîna dîyîş. Lazimîya cinîyan bi raşteyê komelbîyayîşî esta. Nimune, Stenbol de Komeleya Cinîyan a Golelî ameye awankerdiş û uca de cinî werdan, berardişê destan viraştêne û rotêne. Berardişê aîdê Erdexanî viraştêne. Ma zî eşkenê Erdexaan de platformêk winasî awan bikerê. Gole, Hoçvan, Damala, Posof û Çildirî de eşkîyeno raşteyê seba cinîyan bêrê awankerdiş.”

	 

	Paştîdayîşê cinîyan muhîm o 

	 

	Dîcleye qiseykerdişê xo yê peyênan de ard ziwan ke seba raşteyê komelbîyayîşî bêrê awankerdiş lazimî bi cinîyan esta û wina peynî ard: “Ganî ma dayîkanê xo dawetê raşteyan bikerê. Ganî ma xebata weçînayîşî pîya rayra berê. Seba caardişê înan bi raştî lazimî bi paştîdayîşê cinîyan esta. Bi serran o Erdexan de parlementerê cinî nêvejîyeno. Partîya cinîyan ra qey parlamenter nêvejo? Herinda mi de eşkîyeno cinîyê bînî zî bibayêne hêvîye. Wa cinî bêveng nêmanê. Ma bi hêvî yê, ma bi erc ê. Ma seba seba ameyoxî benê hêvî.”