Konbajarê Çemê Dîcle ameyî wedaritiş

2023-04-24 15:46:54


	AMED - Pêwa hişyarîyê seba tedbîrê felaketê laserî zî konbajarê ke hetê walîtî û şaredarîya Amedî ra Çemê Dîcleyî amebî awankerdiş, ameyî wedaritiş. 

	 

	6ê Sibate de di erdlerzê ke merkezê înan qezayê  Bazarcix û Elbistanê Mereşî de virazîyabî û tesîr serê  11 bajaran de kerdibi. Yew nê bajaran ra zî Amed o. Walîtiya Amedî û Şaredarîya Bajarê Girdî ya Amedî ke binê îdarekarîya qeyûmî de yo, pêwa heme hişyarîyê rêxistinê sivîlî zî kîşte Çemê Dîcleyî de  konbajar amebi awankerdiş û mexdûrê erdlerzî ci de bica kerdibî.

	 

	Heyetê Koordînasyonê Bajarî yê TMMOBê Amedî verê walîtî û şaredarî rawuştib û bale antibi serê tehlukeyê ke Çemê Dîcleyî de virazîyo û konbajar bikero tehluke. Pêwa nê hişyarî zî reyna konbajar amebi awankerdiş. 

	 

	15ê adare de seba tehlukeyê laserî konbajarî amebî vengkerdiş. Konbajarî 4 hezar û 200 konan pê yeno ewro bi temamî ame wedaritiş. Senîn ke leşker û qorîcî konbajar awan kerdibî wedaritişê konan zî reyna hetê leşker û polîsan ra pê ame.