Înfazê Jîyan Ateşa tepişteye reya çarine ame veşênayîş 

2023-04-14 16:25:47


	 

	ANQARA - Jîyan Ateşa ke Zîndanê Tepişteyê Cinîyan ê Sîncanî de yena tepiştiş, reya çarine ame veşênayîş.

	 

	Jîyan Ateşa ke seba îddiayê "endamîya rêxistine" 12 serrî û 9 aşmî ceza ci rê ameye birnayîş, bi 11 serrî yo zîndan de ya. Pêwa 27ê Teşrîna Verêne de cezaya aye qediya zî labelê nêameye tehlîyekerdiş. 

	 

	Waya Jîyane, Îpek Ateş aye reyde bi telefon qisey kerd û Jîyane bi rayîrê telefonî dîyar kerd ke seba qerarê Heyetê Îdare û Muşahadeyî reya çarine tehliyeyê aye ameyo astengkerdiş.  

	 

	Sey sebebê veşênayîşê înfazî zî "nêpoşmanî û derbaznebîyayîşê qawişa azad" ame mojnayîş. 

	 

	Sewbîna Jîyane da zanayîş ke înfazê 14 cinîyanê bînan ê Zîndanê Cinîyan ê Sîncanî ameyê veşênayîş.